महेंद्र वाडेकरने व्यवसायात उमटविली मोहोर

वाडेकरांच्या व्यवसायाला 40 वर्षांची परंपरा

| चौल | प्रतिनिधी |

स्वप्नं सत्यात उतरवण्यासाठी जीवतोड मेहनत केल्यास एक ना एक दिवस यश आपल्याकडे आपोआप चालत येते, ही कहाणी आहे अलिबाग तालुक्यातील रेवदंडा येथील चणे-शेंगदाणे विक्रीचा व्यवसाय करणाऱ्या वाडेकर कुटुंबाची. गेली चाळीस वर्षे हे कुटुंब या व्यवसायात आहे. याच कुटुंबातील महेंद्र वाडेकर या तरुणाने स्वतःला सिद्ध करत या व्यवसायात आपली मोहोर उमटवली आहे.

व्यवसाय करण्याची जिद्द आणि चिकाटी व मेहनत घेण्याची इच्छाशक्ती असली, की व्यवसायात मोठी झेप घेता येते, हे रेवदंडा येथील महेंद्र वाडेकर या तरुणाने दाखवून दिले आहे. चणे-शेंगदाणे विकणारा हा तरुण आज याच व्यवसायात यशस्वी झाला असून, संपूर्ण कुटुंबाचा भार स्वतःच्या खांद्यावर पेलत आहे. त्याचे काका रवींद्र वाडेकर यांचेही या व्यवसायात मोलाचे सहकार्य असल्याचे महेंद्रने निक्षून सांगितले.

वाडेकर कुटुंबाचे महेंद्र चणा मार्ट हे रेवदंडा येथे 40 वर्षांपासून चणे-फुटाणे विक्रीचे दुकाने आहे. आपल्या कुटुंबियांनी सुरु केलेला व्यवसाय त्यांची दुसरी पिढीसुद्धा तितक्याच मेहनतीने पुढे नेत असल्याने महेंद्र या तरुणाच्या कष्टातून दिसून येते. आईवडिलांच्या निधनानंतर लहानपणीच व्यवसायाची जबाबदारी महेंद्रवर पडली. सकाळी उठून दुकान लावण्यापासून चणे-वाटाणे, शेंगदाणे भाजण्यापर्यंत सर्व कामे सफाईदारपणे करताना पाहून नवल वाटते. याबाबत त्याला विचारले असता, कोणताही व्यवसाय लहान-मोठा नसतो, तो फक्त आणि फक्त व्यवसाय असतो. तुम्ही करीत असलेले प्रत्येक काम सन्मानजनक असते, असे उत्तर त्याने दिले. दुकानासाठी लागणारा सर्व कच्चा माल वाशी येथील मार्केटमधून आणण्यात येतो, असे त्याने सांगितले. महेंद्रचे शिक्षण दहावीपर्यंत झाले आहे. परंतु, व्यवसाय करीत असताना शिक्षण आड येत नसल्याचे महेंद्रने सांगितले.

कडधान्य भाजण्यासाठी शेतकऱ्यांची गर्दी
हिंदू धर्मियांचा श्रावणातील पहिला सण नागपंचमी. हा सण उद्या मंगळवार, दि. 29 जुलै रोजी साजरा होणार आहे. त्यानिमित्त पंचक्रोशितील शेतकरी आपल्या शेतात पिकविलेले कडधान्य भाजण्यासाठी भट्टीवर भाजण्यासाठी येतात. मागील चार दिवसांपासून सकाळापासून रात्रीपर्यंत हे काम सुरू असून, दुकान गर्दी झाल्याचे पाहावयास मिळते. व्यवसाय करण्याची जिद्द आणि गिऱ्हाईकाचे मन जिंकता आले की कोणतीच अडचण येत नसल्याचे महेंद्र म्हणाला.

काकामुळे धंद्याला उभारी
सणासुदीच्या काळात धंदा म्हटले की घरची माणसे असतील तेवढी कमीच. काका रवींद्र वाडेकर याची मदत मोलाची आहे. महेंद्र चणामार्टचा डोलारा उभारण्यात काकाचीच मेहनत, कष्ट मोठे आहेत. अलिबाग, कुरुळ, हटाळे, सहाण आदी ठिकाणच्या आठवडा बाजारात चणे-फुटाणे विक्रीचे दुकान लावण्यात येते. गणपती विसर्जनस्थळी, नवरात्रौत्सवात भरणाऱ्या यात्रांमध्ये चणे विक्रीचा व्यवसाय करतो. या सर्व धावपळीत काकाची साथ लाभते.