गगनबावडा घाटात दरड कोसळली

। कोल्हापूर । प्रतिनिधी ।

कोल्हापूर आणि सिंधुदुर्ग जिल्ह्यांना जोडणारा महत्त्वाचा रस्ता असलेला वैभववाडी तालुक्यातील गगनबावडा घाट दरड कोसळल्याने वाहतुकीसाठी बंद करण्यात आला आहे. ही घटना आज, सकाळी आठ वाजता घडली. गेल्या काही दिवसांपासून या भागात सुरू असलेल्या मुसळधार पावसामुळे घाटात मोठी दरड कोसळली. या दरडीत मोठे दगड असल्याने ते हटवण्याच्या कामात अडचण येत आहे. ​सार्वजनिक बांधकाम विभागाचे अधिकारी घटनास्थळी असून, ढिगारे बाजूला काढण्याचं काम वेगाने सुरू आहे. अधिकाऱ्यांनी दिलेल्या माहितीनुसार, संध्याकाळी चार वाजेपर्यंत हा घाट वाहतुकीसाठी पुन्हा खुला होण्याची शक्यता आहे. यामुळे या मार्गावरून प्रवास करणाऱ्या वाहनचालकांनी पर्यायी मार्गांचा वापर करावा, असे आवाहन केले आहे. त्यामुळे वाहतूक पर्यायी फोंडाघाट मार्गे वळवण्यात आली आहे.