रायगड फोटो एक्स्पो संपन्न

| अलिबाग | प्रतिनिधी |

रायगड फोटोग्राफर्स अँड व्हिडीओ ग्राफर्स असो.च्यावतीने जिल्ह्यातील छायाचित्रकारांना नवीन तंत्रज्ञान अवगत व्हावे, छायाचित्रणा संदर्भात लागणाऱ्या वस्तू एकाच ठिकाणी उपलब्ध व्हाव्या, या उद्देशाने सलग दुसऱ्या वर्षी ‌‘रायगड फोटो एक्स्पो’चे आयोजन पेणमधील मराठा समाज हॉल मध्ये करण्यात आले होते.
या एक्स्पोचे उद्घाटन जिल्हा उद्योग केंद्राचे जनरल मॅनेजर जी.एस. हरळय्या, जिल्हा मध्यवर्ती सहकारी बँकेचे मुख्य कार्यकारी अधिकारी मंदार वर्तक यांच्यासह इतर मान्यवरांच्या हस्ते करण्यात आले.

यावेळी असोसिएशनचे संस्थापक विवेक सुभेकर, अध्यक्ष समीर भायदे, उपाध्यक्ष समीर मालोदे, सचिव आनंद नींबरे, सहसचिव दीपक बडगुजर, खजिनदार जितेंद्र मेहता, कार्यकारिणी सदस्य अविनाश राऊत, अनिरुद्ध जोशी, सुशिल घाटवळ, निलेश शिर्के, सल्लागार दादा आर्ते, एक्स्पोच्या आयोजनासाठी मेहनत घेणाऱ्या पेण फोटोग्राफर असो.चे अध्यक्ष समाधान पाटील, उपाध्यक्ष संदीप म्हात्रे, सर्व असो.चे अध्यक्ष व पदाधिकारी उपस्थित होते.

या एक्स्पोमध्ये मुंबई, पुणे व ठाणे येथील निकॉन, कॅनॉन, फ्युजिफिल्म, रॉयल अल्बम, प्रिंटर, फ्रेम्स, बेबी शूट क्रॉप्स, थ्रीडी बॅग्राऊंड अशा छायाचित्रणासंदर्भात विविध प्रकारचे 18 स्टॉल उपलब्ध करण्यात आले होते. या एक्स्पोचे खास आकर्षण म्हणून रायगड फोटो सुदंरी नावाने फॅशन शोचे देखील आयोजन करण्यात आले होते.

ज्येष्ठ छायाचित्रकार प्रकाश सकपाळ, पराग गुप्तन, प्रशिक्षक पराग शिंदे, महेश तावरे यांचा असो.च्यावतीने सन्मान करण्यात आला. त्याचबरोबर असो.च्यावतीने घेण्यात आलेल्या ‌‘रंगोत्सव 2025′ या छायाचित्रण स्पर्धेतील विजेत्या स्पर्धकांना मान्यवरांच्या हस्ते पुरस्कार देण्यात आले. यावेळी पेण, अलिबाग, पोयनाड, मुरूड, रोहा, पाली, नागोठणे, खोपोली, कर्जत, नेरळ, माणगाव, महाड, पोलादपूर, श्रीवर्धन, म्हसळा, उरण व रसायनी फोटोग्राफर्स असो.मधून 465 छायाचित्रकारांनी या एक्स्पोला भेट दिली. हा एक्स्पो यशस्वी करण्यासाठी पेण फोटोग्राफर्स असो.ने मेहनत घेतली.