ऊसतोड मजुरांकडून मोरांची शिकार; सहा जणांवर गुन्हा दाखल

। महाड । प्रतिनिधी ।

हातनूर ता. तासगाव येथे शनिवारी रात्री ऊसतोड करणाऱ्या मजुरांच्या टोळीने मांस खाण्यासाठी दोन मोरांची शिकार केल्याची घटना समोर आली आहे. ग्रामस्थांनी त्यांना घेरून ताब्यात घेत वनविभाग व पोलिसांच्या ताब्यात दिले.

मिळालेल्या माहितीनुसार, हातनूर परिसरात ऊसतोड करण्यासाठी रायगड जिल्ह्यातील ऊसतोड मजुरांची टोळी दाखल झाली आहे. ही टोळी शिकार करत असल्याचा संशय गावातील लोकांना आठ दिवसांपूर्वीच आला होता. त्यामुळे त्यांच्यावर लक्ष ठेवून होते. शनिवारी रात्री अजित सोनटक्के यांच्या शेतात झाडावर बॅटरीचा उजेड दिसला. दरम्यान, 25हून अधिक शेतकरी व ग्रामस्थांनी टोळीला घेरून ताब्यात घेतले. टोळीने दोन मोरांची शिकार केल्याचे दिसून आले. ग्रामस्थांनी तासगाव पोलीस आणि वन विभागाशी संपर्क साधून मध्यरात्री बारा वाजता त्यांना बोलावून घेतले. वनविभागाच्या पथकाने सहा जणांना ताब्यात घेतले. वामन जाधव (36), रा. कुंभार्डा, ता. महाड, रत्नाकर पवार (39), रा. अंबवली, किशोर पवार (22), रा. सापेगाव, सचिन वाघमारे (23), सत्यवान वाघमारे (21), नितीन वाघमारे (20), तिघे रा. चोचिंदे, ता. महाड या सहा जणांविरुद्ध गुन्हा दाखल करण्यात आला आहे. रविवारी दुपारी सांगलीचे उपवनसंरक्षक सागर गवते यांच्या मार्गदर्शनाखाली सहायक वनसंरक्षक पथक पंचनाम्यासाठी हातनूर येथे संशयितांना घेऊन आले होते. त्यांनी घटनास्थळाचा पंचनामा केला. या ठिकाणी त्यांना मोराची पिसे, लगोर, बॅटरी आदी शिकारीसाठीचे साहित्य जप्त केले.