विशाल शिंपीला दहा दिवसांची पोलीस कोठडी

प्रसन्न पुलेकर प्रकरणात सहभागी असल्याने पोलिसांकडून अटक

| मुरुड -जंजिरा | प्रतिनिधी |

मुरुड शहर व ग्रामीण भागातील जनतेस कमीत कमी एक लाख रुपये गुंतवल्यास प्रत्येक महिन्यास दहा हजार रुपये व्याज देण्याचे आमिष दाखवून कोट्यवधी रुपयांची गुणवणूक करणारा व तद्नंतर पैसे देण्यास नकार देणारा प्रसन्न पुलेकर यास मुरुड पोलिसांनी काही दिवसांपूर्वी अटक केली होती. याप्रकरणी चौकशीदरम्यान विशाल शिंपीला प्रसन्न पुलेकर प्रकरणात सहभाग असल्याने अटक करण्यात आली आहे.

दरम्यान, जुलै महिन्यापासून अटक असणाऱ्या प्रसन्न पुलेकराला न्यायायल्याने जामीन मंजूर न केल्याने अलिबाग येथील जेलमध्ये खितपत पडला आहे. सदरचे प्रकरण हे कोट्यवधी रुपयांचे असल्याने मुरुड पोलीस याचा कसून तपास करीत आहेत. मुख्य तक्रारदार महेश भगत यांनी व त्यांच्यासह 136 जणांनी आपली फसवणूक झाल्याची तक्रार मुरुड पोलीस ठाण्यात नोंदवली होती. मुरुड पोलीस ठाण्याचे पोलीस निरीक्षक परशुराम कांबळे यांच्या मार्गदर्शनाखाली हा तपास सुरू असून, प्रत्येक बाब तपासली जात आहे. कोणतीही बँक नसताना बँकेप्रमाणे आर्थिक व्यवहार करणे हा कायदेशीर गुन्हा असल्याने पोलीस याचा कसून तपास करीत आहेत.

प्रसन्न पुलेकरला लाखो रुपयांचे आर्थिक व्यवहार केल्याचे आढळून आल्याने व याची पोलीस तपासात समाधानकारक उत्तरे विशाल शिंपी याने न दिल्यामुळे मुरुड पोलिसांनी पोलीस निरीक्षक परशुराम कांबळे यांच्या मार्गदर्शनाखाली शिंपीला अटक करण्यात येऊन न्यायालयात हजर केले असता प्रथम त्याला पाच दिवसांची व पुन्हा न्यायालयात हजर केले असता पाच दिवसांची पोलीस कोठडी देण्यात आली आहे.

प्रसन्न पुलेकरला लाखो रुपये आर्थिक व्यवहार केलेल्या प्रत्येक व्यक्तीची मुरुड पोलिसांकडून कसून चौकशी करण्यात येत आहे. विश्वसनीय सूत्रांकडून मिळालेल्या माहितीनुसार, मुरुड शहरातील 15 व्यक्तींची मुरुड पोलिसांकडून कसून चौकशी करण्यात आल्याचे समजत आहे. ज्यांनी ज्यांनी प्रसन्न पुलेकर याच्याशी लाखो रुपयांचे आर्थिक व्यवहार केले आहेत, त्यांचे बँक स्टेटमेंट तपासण्याचे काम सध्या पोलिसांकडून सुरु असून, संशयितांना चौकशीसाठी पोलीस ठाण्यात बोलावण्यात येत आहे.

याबाबत मुरुड पोलीस ठाण्याचे पोलीस निरीक्षक परशुराम कांबळे यांनी सांगितले आहे की, प्रसन्न पुलेकर प्रकरणात सहभागी असलेल्या सर्वांची चौकशी करण्याचे काम सुरु आहे. विशाल शिंपीने प्रसन्न पुलेकर याच्याशी लाखो रुपयांचे आर्थिक व्यवहार केल्याचे बँक स्टेटमेंटवरून सिद्ध झाल्याने त्याला चौकशीसाठी पोलीस ठाण्यात बोलावले असता त्याने याबाबत समाधानकारक उत्तरे न दिल्याने त्याला अटक करून न्यायालयात हजर केले असता त्याला पोलीस कोठडी देण्यात आल्याचे सांगितले. याबाबतचा तपास सुरु असल्याचे पोलीस निरीक्षक परशुराम कांबळे यांनी सांगितले.