घाटकोपरमधील चाळीत आग

चार मुलांसह सहा जण जखमी

। मुंबई । प्रतिनिधी ।

घाटकोपरमध्ये एका चाळीत आग लागली. ही घटना सोमवारी (दि.24) दुपारी घडली. या आगीत चार मुलांसह किमान सहा जण जखमी झाले आहेत. प्रतीक कुमार मुखिया (10), पूजा मुखिया (6), गौरी मुखिया (10), प्रशांत विश्वकर्मा (9), दलत देवी मुखिया (40) आणि नागेश्वर मुखिया (45) अशी जखमींची नावे असून त्यांना राजावाडी रुग्णालयात दाखल करण्यात आले.

ही दुर्घटना पंतनगरमधील 90 फूट रोडवरील साई नगर येथे दुपारी 12.49 वाजताच्या सुमारास घडली. आगीत विद्युत वायरिंग आणि इन्स्टॉलेशन्स, गळती होणारा एलपीजी सिलेंडर, गॅस स्टोव्ह, भांडी, घरगुती कपडे आणि इतर घरगुती साहित्याचा समावेश होता. आगीची माहिती मिळताच अग्निशमन दल, पोलीस पथके, बीएमसी वॉर्ड कर्मचारी आणि 108 रुग्णवाहिका तात्काळ घटनास्थळी दाखल झाल्या. एक तासाच्या अथक प्रयत्नांनंतर आगीवर नियंत्रण मिळवण्यास अग्नीशमन दलाला यश मिळाले.