माणगावच्या स्वराची जिल्हा क्रिकेट संघात निवड

। माणगाव । प्रतिनिधी ।

माणगाव शहराच्या क्रीडा आणि शैक्षणिक क्षेत्राला अभिमान वाटावा अशी आनंदाची बातमी समोर आली आहे. माणगाव शिक्षण प्रसारक मंडळाच्या सुधाकर नारायण शिपुरकर व गणेश यशवंत वाघरे इंग्रजी माध्यम शाळेची माजी विद्यार्थिनी, स्वरा नंदिनी नितीन बामगुडे हिची रायगड जिल्हा मुलींच्या क्रिकेट संघात निवड झाली आहे. तिच्या या यशाने संपूर्ण माणगाव शहर भारावून गेले आहे. एका सर्वसामान्य कुटुंबातील मुलीने कठोर परिश्रम, शिस्त आणि जिद्दीच्या जोरावर जिल्हास्तरावर आपले नाव कोरणे ही केवळ वैयक्तिक नव्हे, तर संपूर्ण शहरासाठी प्रेरणादायी यशकथा ठरली आहे.

स्वरा ही केवळ उत्कृष्ट क्रिकेटपटूच नाही, तर अभ्यासातही तितकीच चमकदार आहे. इयत्ता दहावीच्या परीक्षेत 95 टक्के गुण मिळवत प्रथम क्रमांक पटकावणारी स्वरा सध्या नवी मुंबईच्या नेरुळ येथील डॉ. डी. वाय. पाटील कॉलेजमध्ये उच्च शिक्षण घेत आहे. शिक्षणासोबत क्रीडा क्षेत्रातही आपली वाटचाल ती तितक्याच आत्मविश्वासाने करत असून, येथील भव्य स्टेडियममध्ये भारत रत्न ‘मास्टर ब्लास्टर’ सचिन तेंडुलकर क्रिकेट अकॅडमीत ती नियमित सराव करत आहे.

माणगाव येथील शिपुरकर व वाघरे शाळेत शिक्षण घेत असतानाच स्वऱाने क्रिकेटची स्वप्ने पाहायला सुरुवात केली. पहाटे सकाळी सहा वाजता धनसे मैदानावर घाम गाळत घेतलेले क्रिकेटचे प्राथमिक धडे आज तिच्या यशाचा मजबूत पाया ठरले आहेत. या प्रवासात शाळेच्या व्यवस्थापनाने, शिक्षकांनी आणि क्रीडा प्रशिक्षकांनी तसेच आई नंदिनी व वडील नितीन बामगुडे यांनी तिला वेळोवेळी प्रोत्साहन देत तिच्या स्वप्नांच्या पंखांना बळ दिले. सध्या नवी मुंबई येथे दररोज तीन सत्रांत कठोर सराव करत असलेली स्वरा ही यष्टिरक्षक आणि आघाडीची फलंदाज असल्याने ती दुहेरी मेहनत घेत आहे. तिच्या खेळातील सातत्य, तांत्रिक कौशल्य, आत्मविश्वास आणि जिद्द पाहून महाराष्ट्र राज्य क्रिकेट निवड समितीने तिला रायगड जिल्हा क्रिकेट संघात महत्त्वाचे स्थान देत माणगावच्या या उदयोन्मुख प्रतिभेचा गौरव केला आहे. लवकरच ती महाराष्ट्रातील विविध शहरांमध्ये होणाऱ्या स्पर्धांमध्ये रायगड जिल्ह्याचे प्रतिनिधित्व करणार आहे.

स्वरा बामगुडे हिच्या या उल्लेखनीय निवडीबद्दल सर्व स्तरांमधून तिचे मनापासून अभिनंदन करून पुढील वाटचालीसाठी मनःपूर्वक शुभेच्छा दिल्या जात आहेत. आज स्वरा बामगुडेचे यश हे माणगावमधील अनेक मुलींसाठी आशेचा किरण ठरत आहे. कष्ट, शिस्त आणि सकारात्मक दृष्टिकोन ठेवला तर ग्रामीण भागातील मुलीही राष्ट्रीय-आंतरराष्ट्रीय स्तरावर झेप घेऊ शकतात, याचा जिवंत दाखला म्हणजेच स्वरा बामगुडे होय.