पुणे ग्रँड चॅलेंज सायकल टूर दरम्यान भीषण अपघात

मुळशी-कोळवण रस्त्यावर 70 हून अधिक सायकलपटू एकमेकांवर आदळले

| पुणे | प्रतिनिधी |

पुणे जिल्हा प्रशासनाच्या नियोजनावर प्रश्नचिन्ह निर्माण करणारी गंभीर घटना मंगळवारी मुळशी तालुक्यात घडली. ‌‘पुणे ग्रँड चॅलेंज सायकल टूर’दरम्यान मुळशी-कोळवण रस्त्यावर झालेल्या साखळी अपघातात 70 हून अधिक सायकलपटू एकमेकांवर आदळले. या अपघातात अनेक खेळाडू जखमी झाले असून, काहींना तातडीने वैद्यकीय उपचार देण्यात आले.

ही स्पर्धा कोळवण रोडवरून सुरू असताना रस्त्याची रुंदी अचानक कमी झाली. ताशी 60 ते 70 किलोमीटर वेगाने धावणाऱ्या सायकलपटूंना अरुंद रस्ता आणि तीव्र वळणाचा अंदाज न आल्याने आघाडीवरील एका सायकलपटूचा ताबा सुटला. यानंतर मागून येणारे खेळाडू एकामागोमाग एक एकमेकांवर आदळले आणि साखळी अपघात झाला. अनेक खेळाडू ट्रॅक सोडून बाजूला फेकले गेले.

प्राथमिक माहितीनुसार, अनेक सायकलपटूंना किरकोळ जखमा झाल्या असून, चार ते पाच खेळाडूंना गंभीर दुखापतीमुळे तातडीने उपचारासाठी हलवण्यात आले. अपघातानंतर सुमारे 15 मिनिटे स्पर्धा थांबवण्यात आली होती, त्यानंतर पुन्हा रेस सुरू करण्यात आली. या घटनेनंतर प्रशासनाच्या नियोजनावर संताप व्यक्त केला जात आहे. आंतरराष्ट्रीय दर्जाची स्पर्धा आयोजित करताना रस्त्यांची स्थिती, अरुंद भाग आणि धोकादायक वळणांची पूर्वकल्पना खेळाडूंना देण्यात आली नव्हती, असा आरोप होत आहे. तसेच वळणावर आवश्यक बॅरिकेडिंग व धोक्याचे सूचना फलक अपुरे असल्याचेही निदर्शनास आले आहे.