मुंबईत लाऊडस्पीकरखाली तीन वर्षांच्या चिमुकलीचा मृत्यू

। मुंबई । प्रतिनिधी ।

प्रजासत्ताक दिनानिमित्त लावण्यात आलेला स्पीकर कोसळून तीन वर्षांच्या मुलीचा मृत्यू झाल्याची धक्कादायक घटना समोर आली आहे. मुंबईतील विक्रोळी भागात टागोर नगरमधील आंबेडकर नगर परिसरात हा प्रकार घडला. या घटनेचा धक्कादायक सीसीटीव्ही समोर आला असून कचरा गोळा करणाऱ्या व्यक्तीच्या हलगर्जीमुळे ही घटना घडल्याचा आरोप आहे.

26 जानेवारी रोजी प्रजासत्ताक दिनानिमित्त येथे कार्यक्रम आयोजित करण्यात आला होता. कार्यक्रमासाठी रस्त्याच्या दोन्ही बाजूंना मोठे लाऊडस्पीकर बसवण्यात आले होते. मात्र, सुरक्षा उपायांकडे दुर्लक्ष झाल्याने ही दुर्घटना घडल्याचे प्राथमिक तपासात समोर येत आहे.

मिळालेल्या माहितीनुसार, रस्त्यावर लाऊडस्पीकरची वायर अस्ताव्यस्त पडलेली होती. भंगार साहित्य घेऊन जाणाऱ्या एका व्यक्तीच्या पायात ही वायर अडकली. त्याने ती वायर काढण्याचा प्रयत्न करताच रस्त्याच्या दोन्ही बाजूंना असलेले लाऊडस्पीकर अचानक खाली कोसळले. त्याच क्षणी धावत असलेली तीन वर्षांची चिमुकली या लाऊडस्पीकरखाली चिरडली गेली आणि ती गंभीर जखमी झाली. घटनेनंतर स्थानिक नागरिकांनी तत्काळ मुलीला रुग्णालयात दाखल केले. मात्र, उपचारादरम्यान डॉक्टरांनी तिला मृत घोषित केले. या घटनेमुळे परिसरात शोककळा पसरली आहे. या प्रकरणी विक्रोळी पोलीस ठाण्यात कार्यक्रमाच्या आयोजकांविरुद्ध गुन्हा दाखल करण्यात आला आहे. निष्काळजीपणामुळे निष्पाप जीव गमावल्याचा आरोप करण्यात आला असून, पोलिसांकडून या संपूर्ण घटनेचा सखोल तपास सुरू आहे.