‘जागर दुर्गांचा, ध्यास गडकोट संवर्धनाचा’ कार्यक्रम

। चिरनेर । प्रतिनिधी ।

जाणता राजा प्रतिष्ठान पागोटे-उरण व दुर्ग अभ्यासक कैलासराजे घरत यांच्या वतीने ‘जागर दुर्गांचा, ध्यास गडकोट संवर्धनाचा’ कार्यक्रम नवघर उरण येथील रा.जि.प. शाळेत मोठ्या उत्साहात साजरा करण्यात आला. या कार्यक्रमाला पाहुणे म्हणून उपस्थित असणारे मिलिंद खारपाटील, विजय गायकर यांच्या हस्ते दीपप्रज्वलन व छत्रपती शिवाजी महाराजांच्या प्रतिमेस पुष्पहार अर्पण करण्यात आला. कार्यक्रमाचे सूत्रसंचालन विवेक पाटील यांनी केले. यावेळी उरण पंचायत समितीचे माजी उपसभापती महादेव बंडा, अविनाश म्हात्रे शिवसेना शाखाप्रमुख सुनील जोशी, सामाजिक कार्यकर्ते मितेश पाटील आदर्श शिक्षक कौशिक ठाकूर, सचिव विशाल ठाकूर, रोशन ठाकूर सहसचिव, संजीव पाटील, भरत पाटील, उपसरपंच विश्वास तांडेल आदी मान्यवर उपस्थित होते. शिवकन्या ओवी कैलासराजे घरत हिने पहाडी आवाजात गारद दिली. दुर्ग अभ्यासक पत्रकार कैलासराजे घरत यांनी विद्यार्थी आणि मान्यवर यांच्यासोबत ध्येय मंत्र आणि गडकोट प्रतिज्ञा घेतली आणि गडकिल्ल्यांची माहिती देत इतिहास जागविला. मुख्याध्यापिका समता ठाकूर, उपशिक्षिका उषा गावंड, प्रकाश जोशी, गणेश गावंड, प्रसाद म्हात्रे, अनिल म्हात्रे, सरीता गोरे यांच्यासह विद्यार्थ्यांचे मोलाचे सहकार्य लाभले.