उन्हाळ्यात पाणीटंचाईपासून वन्यजीवांना दिलासा
। पनवेल । प्रतिनिधी ।
आगामी उन्हाळ्यात उद्भवणारी पाणीटंचाई लक्षात घेऊन कर्नाळा पक्षी अभयारण्यात वनविभागाने पाणीसाठ्याची व्यवस्था केली आहे. पावसाळ्यात डोंगराळ भागातून वाहून जाणारे पाणी अडविण्यासाठी अभयारण्यात सहा ठिकाणी सिमेंट नाला बांध उभारण्यात आले आहेत. सुमारे 12 लाख रुपये खर्चून करण्यात आलेल्या या कामामुळे उन्हाळ्यात पक्षी आणि वन्यप्राण्यांना पिण्यासाठी पाणी उपलब्ध होणार आहे.
कर्नाळा पक्षी अभयारण्य विविध प्रजातींचे पक्षी आणि वन्यप्राण्यांचे नैसर्गिक अधिवासस्थान आहे. उन्हाळ्यात जंगलातील नैसर्गिक पाणवठे आटत असल्याने वन्यजीवांची पाण्यासाठी भटकंती होते. ही समस्या टाळण्यासाठी पावसाचे पाणी जंगलातच अडवून त्याचा साठा करण्याचे नियोजन वनविभागाने केले आहे.
अभयारण्याच्या डोंगराळ भागातून पावसाळ्यात मोठ्या प्रमाणात पाणी वाहून जाते. हे पाणी अडवून ठेवण्यासाठी सहा ठिकाणी लहान सिमेंट नाला बांध बांधण्यात आले आहेत. या बंधाऱ्यांमध्ये जमा होणारा पाणीसाठा उन्हाळ्यात वन्यजीवांसाठी उपयोगी ठरणार आहे. त्यामुळे पिण्याच्या पाण्याच्या शोधात वन्यप्राण्यांना करावी लागणारी भटकंती कमी होण्यास मदत होईल.
प्रधान मुख्य वनसंरक्षक (वन्यजीव) रेड्डी यांच्या संकल्पनेतून हा उपक्रम हाती घेण्यात आला. राहुल गवई, उपवनसंरक्षक (वन्यजीव), ठाणे आणि मनोहर दिवेकर, सहाय्यक वनसंरक्षक, कर्नाळा यांच्या मार्गदर्शनाखाली हे काम पूर्ण करण्यात आले.
वन्यजीवांचे संरक्षण करताना त्यांच्या अधिवासात पाणी उपलब्ध करून देणे आवश्यक आहे. त्यादृष्टीने वनविभागाने केलेली ही व्यवस्था महत्त्वपूर्ण मानली जात आहे. पावसाचे पाणी अडवून त्याचा साठा करण्याच्या या उपाययोजनेमुळे कर्नाळा अभयारण्यातील पक्षी आणि वन्यप्राण्यांना उन्हाळ्यात दिलासा मिळणार आहे.






