खालापूर आरोग्य केंद्राचा ढिसाळ कारभार

औषधांचा तुटवडा, रुग्णांची हेळसांड

| खोपोली | प्रतिनिधी |

खालापूर तालुका हा मुंबई आणि पुणे या दोन महानगरांच्या मध्यवर्ती ठिकाण असल्याने हा तालुका नेहमीच कोणत्या ना कोणत्या कारणाने जिल्ह्यात चर्चेत असतो. त्यातच या तालुक्याचा मुख्य असलेला प्राथमिक आरोग्य केंद्र हा अनेक गोरगरीब जनतेला आधार ठरत असताना आताच्या घडीला या आरोग्य केंद्रात रूग्णांची अपुऱ्या औषधांमुळे मोठी हेळसांड होत असल्याने येथील आरोग्य विभागाच्या कारभाराबाबत नाराजी व्यक्त केली जात आहे.

खालापूर तालुक्यात अनेक शासकीय यंत्रणेबाबत तीव्र नाराजी काही ठिकाणी होत असताना त्यातच आता खालापूर प्राथमिक आरोग्य केंद्रातील यंत्रणेबाबत अनेकजण नाराजी व्यक्त करत असून, यामध्ये अपुऱ्या औषधांच्या तुटवण्यामुळे येथील येणाऱ्या रुग्णांना मोठ्या समस्येला सामोरे जावे लागत आहे. याठिकाणी औषधांचा तुटवडा भासत असल्याने अनेक रुग्णांना उपचाराविना घरी माघारी जावे लागते. तर काहीजण बाहेरील खासगी मेडिकलमधून महागडी औषधे खरेदी करत आपल्यावर उपचार घेत असल्याचे पहावयास मिळत आहे.

खालापूर तालुक्यातील जुना मुंबई-पुणे हायवे व त्याचबरोबर मुंबई-पुणे एक्सप्रेस-वे गेल्याने या ठिकाणाला महाराष्ट्र राज्यात वेगळेच नाव प्राप्त झाले असून, याठिकाणी मोठ्या प्रमाणात आदिवासी-ठाकूर समाज वास्तव्यास असल्याने या समाजाबरोबर अनेक गोरगरिबांना उपचारासाठी सरकारची आरोग्य यंत्रणा कामास येत असते. त्यामुळे अनेक जण शासनाच्या प्राथमिक आरोग्य केंद्रात उपचार घेत आपल्या जीवनात पुढील वाटचाल करत असताना आजच्या महागड्या युगात अनेकांना खाजगी रुग्णालयात उपचार घेणे शक्य नसल्याने बहुतांश नागरिक प्रामुख्याने प्राथमिक आरोग्य केंद्र जात उपचार घेत आपल्या शरीरावर निदान करत असतात. त्यामुळे अनेक गोरगरीब जनतेला सरकारचे प्राथमिक आरोग्य केंद्र आधारवड ठरत असताना खालापूर प्राथमिक आरोग्य केंद्रात जात अनेकांनी उपचार घेतले असता आत्ताच्या घडीला या आरोग्य केंद्रात शासनाच्या औषधांच्या तुटवडा भासत असल्याने या ठिकाणी जाणाऱ्या रुग्णाला उपचाराविना माघारी घरी परतावे लागत असल्याने उपचार घेण्यासाठी काहीजण खिशाला कात्री लावत खासगी रुग्णालयात उपचार घेतात. त्यामुळे येथील आरोग्य यंत्रणा सध्याच्या घडीला रामभरोशी बनल्याने येथील आरोग्य यंत्रणेच्या कारभाराबाबत सर्वसामान्य जनता नाराजी व्यक्त करत आहेत.