सहकार क्षेत्राच्या भविष्यासाठी महत्त्वपूर्ण निर्णय

रामफेड व महाराष्ट्र सहकार मंडळाचा संयुक्त करार; प्रशिक्षण, क्षमता विकास केंद्राची स्थापना होणार

| अलिबाग | प्रतिनिधी |

महाराष्ट्रातील सहकारी संस्थांच्या सर्वांगीण विकासासाठी, प्रशिक्षणासाठी व क्षमता वृद्धीसाठी रामफेड-रायगड जिल्हा एम पॅक्स सेवा सहकारी संस्थांचा महासंघ मर्यादीत अलिबाग आणि महाराष्ट्र सहकार विकास महामंडळ यांच्यात महत्त्वपूर्ण सामंजस्य करार करण्यात आला. हा करार सहकार क्षेत्राच्या भविष्यासाठी महत्त्वपूर्ण निर्णय ठरणार आहे. अलिबाग येथील रायगड जिल्हा मध्यवर्ती सहकारी बँकेत आयोजित कार्यक्रमात हा करार संपन्न झाला. या कार्यक्रमाचे आयोजन रामफेड मार्फत करण्यात आले होते.

यावेळी रायगड जिल्हा मध्यवर्ती सहकारी बँकेचे अध्यक्ष जयंत पाटील, बँकेचे मुख्य कार्यकारी अधिकारी मंदार वर्तक, महाराष्ट्र सहकार विकास महामंडळाचे व्यवस्थापकिय संचालक मंगेश तीटकारे, कोकण व पश्चिम महाराष्ट्राचे विभागीय समन्वयक अरुण काकडे, पणन व्यवस्थापक डॉ. भास्कर पाटील, शेतमाल व तारण व्यवस्थापन तज्ज्ञ प्रशांत चासकर, रामफेडचे चेअरमन निनाद पाटील, संचालक विनायक गिजे, तुकाराम पाटील, प्रकाश ठाकूर, गोपीनाथ गंभे, बबन भालेराव, गजानन झोरे आदींसह पदाधिकारी, संचालक मंडळ, प्रतिनिधी, सहकार क्षेत्रातील मान्यवर व सदस्य उपस्थित होते.

या सामंजस्य कराराचा मुख्य उद्देश महाराष्ट्रातील सहकारी संस्थांच्या विकासासाठी सक्षम, आधुनिक आणि मार्गदर्शक प्रशिक्षण व्यवस्था निर्माण करणे हा आहे. या केंद्राच्या माध्यमातून सहकारी संस्था स्थापन करणे, विद्यमान संस्थांचे कामकाज अधिक सक्षम करणे, संचालक व कर्मचाऱ्यांना कायदेशीर, प्रशासकीय, आर्थिक आणि व्यवस्थापकीय प्रशिक्षण देणे, तसेच सहकार क्षेत्रात पारदर्शकता, कार्यक्षमता आणि व्यावसायिकता वाढवणे यावर विशेष भर दिला जाणार आहे. या कराराअंतर्गत महाराष्ट्रातील सहकारी संस्थांसाठी प्रशिक्षण व क्षमता विकास कार्यक्रम राबविणे, संचालक, पदाधिकारी, कर्मचारी व सभासदांसाठी विशेष प्रशिक्षण आयोजित करणे, सहकारी संस्था स्थापन करण्यासाठी मार्गदर्शन करणे, कायदे, नियम, लेखापरीक्षण, व्यवस्थापन व प्रशासन यावरील प्रशिक्षण देणे, शेतकरी उत्पादक संस्था, स्वयं-सहायता गट आणि सहकारी संस्थांना मार्गदर्शन करणे, प्रशिक्षणार्थींना प्रमाणपत्र व्यवस्था उपलब्ध करून देणे आणि सहकारी संस्थांमध्ये कार्यक्षमता व पारदर्शकता वाढवणे या बाबींवर संयुक्तपणे काम करण्यात येणार आहे.

महाराष्ट्र सहकार विकास महामंडळ या प्रशिक्षण केंद्राला तांत्रिक मार्गदर्शन, अभ्यासक्रम निर्मिती, प्रशिक्षण पद्धती, प्रमाणपत्र व्यवस्था, गुणवत्ता नियंत्रण आणि सहकार क्षेत्रातील तज्ज्ञ मार्गदर्शन उपलब्ध करून देणार आहे. तसेच, प्रशिक्षण कार्यक्रमांची गुणवत्ता आणि परिणामकारकता वाढवण्यासाठी आवश्यक साहाय्य व मार्गदर्शन केले जाणार आहे. रामफेडच्या या पुढाकारामुळे महाराष्ट्रातील सहकार क्षेत्राला नवी दिशा मिळणार असून, हा करार सहकार क्षेत्राच्या भविष्यासाठी महत्त्वपूर्ण निर्णय ठरणार आहे.

सहकार चळवळीला नवे बळ
रामफेडने केलेला हा सामंजस्य करार महाराष्ट्रातील सहकार क्षेत्रासाठी दूरदृष्टीपूर्ण आणि महत्त्वपूर्ण पाऊल आहे. सहकारी संस्था केवळ स्थापन होण्यापुरत्या मर्यादित न राहता त्या सक्षम, शिस्तबद्ध, कायदेशीरदृष्ट्या सजग आणि आर्थिकदृष्ट्या मजबूत व्हाव्यात, यासाठी या प्रशिक्षण केंद्राची भूमिका महत्त्वाची ठरणार आहे. या उपक्रमामुळे महाराष्ट्रातील ग्रामीण भागातील सहकारी संस्था, पतसंस्था, शेतकरी गट, स्वयं-सहायता गट, महिला व युवकांना सहकार क्षेत्रात नवीन संधी उपलब्ध होणार आहेत. भविष्यात महाराष्ट्रातून प्रशिक्षित व सक्षम सहकार नेतृत्व तयार करण्यासाठी हा उपक्रम उपयुक्त ठरेल.

भविष्यातील दिशा
या सामंजस्य करारानंतर पहिल्या टप्प्यात सहकारी संस्थांचे संचालक, पदाधिकारी व कर्मचाऱ्यांसाठी प्रशिक्षण कार्यक्रम राबविण्यात येतील. त्यानंतर सहकारी संस्था स्थापन करू इच्छिणाऱ्या गटांना मार्गदर्शन, शेतकरी उत्पादक संस्था व स्वयं-सहायता गटांसाठी विशेष कार्यक्रम, तसेच सहकार क्षेत्रातील कायदे, लेखा, व्यवस्थापन आणि व्यवसाय विकास यावर आधारित प्रशिक्षण सत्रे आयोजित केली जातील.