हरित भविष्यासाठी ट्रान्सवर्डचा संकल्प

पर्यावरण दिनी वृक्षसंवर्धनाचा संदेश

। चणेरा । प्रतिनिधी ।

धाटाव एमआयडीसी परिसरातील विविध औद्योगिक कंपन्यांनी शुक्रवारी (दि.जागतिक पर्यावरण दिन उत्साहात साजरा केला. यामध्ये कामगारहित जपणारी आणि सामाजिक बांधिलकी जपणारी ट्रान्सवर्ड फर्टीकेम कंपनी विशेष ठरली. कंपनीच्या अधिकारी, कर्मचारी आणि कामगारांनी एकत्र येत वृक्षारोपण व वृक्षसंवर्धनाचा दृढ संकल्प करून पर्यावरण संरक्षणाचा प्रभावी संदेश दिला.

पर्यावरण संरक्षण आणि शाश्वत विकासाबाबत जनजागृती व्हावी, या उद्देशाने ट्रान्सवर्ड फर्टीकेमतर्फे वृक्षारोपण उपक्रमाचे आयोजन करण्यात आले होते. कार्यक्रमात सहभागी झालेल्या अधिकारी, कर्मचारी आणि कामगारांनी पारंपरिक महाराष्ट्रीयन फेटा परिधान करून उत्स्फूर्त सहभाग नोंदविला.
या उपक्रमाचा उद्देश केवळ वृक्षारोपणापुरता मर्यादित नसून पर्यावरण संवर्धनाचा संदेश समाजापर्यंत पोहोचविणे, निसर्ग संरक्षणाचे महत्त्व पटवून देणे आणि भावी पिढ्यांसाठी हरित वारसा निर्माण करणे हा असल्याचे कंपनीचे संचालक अरुण वाळुंज यांनी सांगितले. उपस्थितांनी लावलेल्या प्रत्येक वृक्षाचे संगोपन व संरक्षण करण्याची प्रतिज्ञाही यावेळी केली.

धाटाव एमआयडीसीतील ट्रान्सवर्ड फर्टीकेम कंपनीने यंदाचा जागतिक पर्यावरण दिन ‘लोकोत्सव’ म्हणून साजरा केला. कंपनी परिसरात तसेच विविध ठिकाणी वृक्षारोपण करून पर्यावरण संवर्धनाचा संकल्प करण्यात आला. यावेळी मार्गदर्शन करताना संचालक अरुण वाळुंज म्हणाले की, निसर्गाचे रक्षण आणि पर्यावरणाचे जतन ही प्रत्येकाची सामूहिक जबाबदारी आहे. त्या जबाबदारीची जाणीव ठेवून कंपनीने हा उपक्रम राबविला आहे.

यावेळी त्यांनी नैसर्गिक साधनसंपत्तीचा जबाबदारीने वापर, जलसंवर्धन, प्लास्टिकचा कमी वापर तसेच पर्यावरणपूरक जीवनशैली अंगिकारण्याची गरज अधोरेखित केली. कंपनीच्या अधिकारी आणि कर्मचाऱ्यांनीही पर्यावरण संवर्धनाचे महत्त्व विशद करत हरित भविष्यासाठी प्रत्येकाने योगदान देण्याचे आवाहन केले.
कार्यक्रमास महाराष्ट्र प्रदूषण नियंत्रण मंडळाचे (एमपीसीबी) अधिकारी डॉ. गजानन खडकीकर, राजेश औटी आणि ऋतुजा भालेराव यांची प्रमुख उपस्थिती लाभली. तसेच संचालक अरुण वाळुंज, भारतीय कामगार सेनेचे पदाधिकारी व सदस्य, कंपनीचे अधिकारी, कर्मचारी आणि कामगार मोठ्या संख्येने उपस्थित होते.

कार्यक्रमात सर्वांनी उत्स्फूर्त सहभाग घेत पर्यावरण संरक्षण आणि शाश्वत विकासासाठी सक्रिय योगदान देण्याची प्रतिज्ञा केली. या उपक्रमामुळे ट्रान्सवर्ड फर्टीकेमची पर्यावरण संवर्धनाप्रती असलेली बांधिलकी अधिक दृढ झाल्याची भावना उपस्थितांनी व्यक्त केली. पर्यावरण दिनानिमित्त राबविण्यात आलेल्या या उपक्रमाचे सर्व स्तरांतून कौतुक होत असून, उद्योग क्षेत्राने सामाजिक आणि पर्यावरणीय जबाबदारी कशी पार पाडावी, याचा आदर्श ट्रान्सवर्ड फर्टीकेमने घालून दिल्याची प्रतिक्रिया व्यक्त होत आहे. कार्यक्रम यशस्वी करण्यासाठी कंपनीच्या अधिकारी व कर्मचाऱ्यांनी विशेष परिश्रम घेतले.