आरबीआयकडून आरडीसीसीचे विशेष कौतुक

वरिष्ठ अधिकाऱ्यांनी घेतली मुख्य कार्यालयात भेट; आधुनिक बँकिंगचा विशेष गौरव

| अलिबाग | प्रतिनिधी |

रायगड जिल्हा मध्यवर्ती सहकारी बँकेच्या कामाची थेट भारतीय रिझर्व्ह बँकेच्या वरिष्ठ अधिकाऱ्यांनी दखल घेतली आहे. त्यांनी, रायगड जिल्हा मध्यवर्ती सहकारी बँकेचे कार्य सहकार क्षेत्रासाठी मार्गदर्शक ठरू शकते, असे गौरवोद्गार काढले.

भारतीय रिझर्व्ह बँकेच्या मुख्य कार्यालयातील डिपार्टमेंट ऑफ रेग्युलशनचे जनरल मॅनेजर विकासकुमार साहू, असिस्टंट जनरल मॅनेजर धनंजय भासे आणि शैलेश इंगळे यांच्या शिष्टमंडळाने रायगड जिल्हा मध्यवर्ती सहकारी बँकेच्या अलिबाग येथील मुख्य कार्यालयाला भेट देऊन बँकेच्या कामकाजाचा अभ्यास दौरा केला. यावेळी बँकेचे मुख्य कार्यकारी अधिकारी मंदार वर्तक यांनी बँकेच्या वाटचालीचे सविस्तर सादरीकरण केले. नाबार्डचे महाराष्ट्र रिजनल ऑफिसचे एजीएम नवल कन्नोर व बँकेचे उपाध्यक्ष सुरेश खैरे हे देखील उपस्थित होते.

यावेळी, भारतीय रिझर्व्ह बँकेच्या वरिष्ठ अधिकाऱ्यांकडून रायगड जिल्हा मध्यवर्ती सहकारी बँकेच्या वित्तीय समावेशन, ग्रामीण भागातील बँकिंग सेवांचा विस्तार, सहकारी संस्थांच्या सक्षमीकरणासाठी राबविण्यात आलेले उपक्रम, आधुनिक बँकिंग व्यवस्था तसेच व्यवसायवृद्धीची दखल घेत बँकेच्या कामकाजाचे कौतुक करण्यात आले. वित्तीय समावेशनाच्या क्षेत्रात बँकेने केलेल्या कार्याची विशेष दखल घेण्यात आली. त्याचबरोबर बँकेच्या 8 हजार कोटींहून अधिक व्यवसायाचा, सातत्यपूर्ण व्यवसायवृद्धीचा, आधुनिक बँकिंग सेवा, डिजिटल परिवर्तन, रिस्क मॅनेजमेंट, सायबर सुरक्षा, ग्राहकाभिमुख सेवा, तसेच नियामक अपेक्षांनुसार विकसित करण्यात आलेल्या सक्षम व्यवस्थेचा आढावा घेण्यात आला. सहकारी संस्थांच्या सक्षमीकरणासाठी बँकेने सातत्याने राबविलेल्या उपक्रमांचा आणि संस्थांचे संगणकीकरण देशात सर्वप्रथम करून त्यांना आधुनिक बँकिंग व्यवस्थेशी जोडण्यासाठी घेतलेल्या पुढाकाराचाही यावेळी विशेष उल्लेख करण्यात आला.

यावेळी बोलताना विकासकुमार साहू यांनी, मुख्यमंत्री रोजगार निर्मिती कार्यक्रम आणि प्रधानमंत्री रोजगार निर्मिती कार्यक्रम यांच्या प्रभावी अंमलबजावणीद्वारे ग्रामीण उद्योजकता, 20,000 पेक्षा अधिक महिला बचतगट, स्वयंरोजगार आणि सूक्ष्म उद्योगांना बँकेने दिलेल्या पाठबळाचे कौतुक केले. तसेच, ग्रामीण अर्थव्यवस्थेला बळकटी देण्यासाठी अशा योजनांची प्रभावी अंमलबजावणी महत्त्वाची आहे. बँकेने केवळ शहरी भागातच नव्हे तर जिल्ह्यातील कशेळे, मजगाव, नाते, विन्हेरे, विळे, राजपुरी, संदेरी अशा ग्रामीण तथा दुर्गम भागांमध्ये शाखा विस्तार करून सर्वसामान्य नागरिकांपर्यंत बँकिंग सेवा पोहोचविण्याच्या आणि ग्रामीण भागातील प्रत्येक घटकाला औपचारिक बँकिंग व्यवस्थेशी जोडण्याचा बँकेचा प्रयत्न हा वित्तीय समावेशनाचा प्रभावी नमुना असल्याचे देखील त्यांनी सांगितले.

बँकेचे कार्य, रोल मॉडेल कार्य
आगामी काळात कृत्रिम बुद्धिमत्ता, डेटा ॲनालिटिक्स, डिजिटल गव्हर्नन्स, अधिक सक्षम सायबर सुरक्षा आणि आधुनिक बँकिंग तंत्रज्ञानाच्या माध्यमातून ग्राहकांना अधिक सुरक्षित, जलद आणि गुणवत्तापूर्ण सेवा देण्याचा बँकेचा निर्धार यावेळी व्यक्त करण्यात आला. तसेच, बँकेने सहकारी संस्थासाठी केलेले कार्य देशातील रोल मॉडेल कार्य ठरेल, असे विकासकुमार साहू यांनी आपले मत व्यक्त करीत बँकेचे अभिनंदन केले.