सायकल ट्रॅकवर वाहनांचे पार्किंग

| खांदा कॉलनी | प्रतिनिधी |

शहरातील सायकलस्वारांना सुरक्षितपणे सायकल चालवता यावी, यासाठी पनवेल महानगरपालिकेच्या माध्यमातून खारघर परिसरात सायकल ट्रॅक तयार करण्यात आला आहे. मात्र, सायकलस्वारांसाठी असलेल्या याच ट्रॅकवर मोठ्या प्रमाणावर वाहने पार्क केली जात असल्याने सायकलस्वारांना ट्रॅकचा वापर करायचा तरी कसा, असा प्रश्न निर्माण झाला आहे.

शहरात सायकल संस्कृतीला प्रोत्साहन मिळावे आणि नागरिकांनी सायकलचा वापर करावा, या उद्देशाने सायकल ट्रॅकचीनिर्मिती करण्यात आली. मात्र, ट्रॅकवरच दुचाकी आणि चारचाकी वाहने उभी केली जात असल्याने सायकलस्वारांना रस्त्यावरून जीव मुठीत धरून सायकल चालवावी लागत आहे. सायकल ट्रॅकचा वापर वाहनतळ म्हणून होत असताना संबंधित यंत्रणेचे त्याकडे दुर्लक्ष होत असल्याचे चित्र आहे. पार्किंगमुळे ट्रॅक बंदिस्त झाल्याने सायकलस्वारांना मुख्य रस्त्यावर उतरावे लागते. त्यामुळे अपघाताचा धोका वाढण्याची शक्यता आहे. सायकलस्वारांसाठी लाखो रुपये खर्च करून ट्रॅक तयार करायचा आणि त्याच ट्रॅकवर वाहने पार्क करण्याची मुभा द्यायची, तर सायकलस्वारांनी सायकल चालवायची तरी कोणत्या ट्रॅकवर? असा सवाल सायकलस्वारांकडून उपस्थित केला जात आहे. महापालिका आणि वाहतूक पोलिसांनी संयुक्तपणे पाहणी करून सायकल ट्रॅकवरील अनधिकृत पार्किंग तत्काळ हटवावे आणि भविष्यात या ठिकाणी वाहने उभी राहणार नाहीत, यासाठी कठोर कारवाई करावी, अशी मागणी सायकलस्वारांकडून होत आहे.