विनयभंग प्रकरणी मूक मोर्चा

आरोपींवर कडक कारवाईची मागणी

| म्हसळा | प्रतिनिधी |

म्हसळा तालुक्यात मागील दोन महिन्यांत अल्पवयीन मुलींवर लैंगिक अत्याचार केल्याच्या दोन गंभीर घटना समोर आल्या आहेत. या प्रकरणांमध्ये म्हसळा पोलिसांनी एकूण आठ आरोपींना अटक केली आहे. दरम्यान, या घटनांचा निषेध करण्यासाठी सर्वधर्मीय नागरिकांनी एकाच महिन्यात दुसऱ्यांदा मूक मोर्चा काढला. यावेळी संबंधित आरोपींवर कठोरात कठोर कारवाई करण्यात यावी, अशी मागणी नागरिकांनी केली आहे.

म्हसळा तालुक्यात मागील दोन महिन्यांत कांदळवाडा आणि म्हसळा शहरात अल्पवयीन मुलींना आमिष दाखवून त्यांची फसवणूक करून लैंगिक अत्याचार केल्याच्या दोन गंभीर घटना समोर आल्या आहेत. या प्रकरणांमध्ये म्हसळा पोलिसांनी दोन स्वतंत्र गुन्ह्यांत एकूण आठ आरोपींना अटक केली आहे. या घटनांचा निषेध करण्यासाठी सर्वधर्मीय नागरिकांनी एकाच महिन्यात दुसऱ्यांदा मूक मोर्चा काढला. म्हसळा-पाभरे फाटा येथून तहसीलदार कार्यालयापर्यंत मूक मोर्चा काढून नागरिकांनी प्रशासनाचे लक्ष वेधले. यावेळी तहसील कार्यालयाच्या प्रांगणात समाजातील मान्यवर तसेच तालुक्यातील लोकप्रतिनिधींनी घटनेचा तीव्र निषेध व्यक्त करत संबंधित आरोपींवर कठोरात कठोर कारवाई करण्यात यावी, अशी मागणी नागरिकांनी केली. याबाबत म्हसळा तहसीलदार अव्वल कारकून सचिन धोंडगे आणि पोलीस उप अधीक्षक योगिता कुटे यांना निवेदन देण्यात आले. या निवेदनाद्वारे, “अल्पवयीन मुलींच्या सुरक्षिततेचा प्रश्न गंभीर असून, अशा घटना पुन्हा घडू नयेत यासाठी पोलीस प्रशासनाने प्रभावी उपाययोजना कराव्यात. तसेच, दोषींवर कायद्यानुसार कठोर कारवाई करावी,” अशी मागणी करण्यात आली आहे. तसेच, या मोर्चादरम्यान समाजातील विविध घटकांनी प्रशासनाने अशा घटनांची गांभीर्याने दखल घेऊन जनजागृती व प्रतिबंधात्मक उपाययोजना करण्याची आवश्यकता व्यक्त केली. पालकांनी तसेच नागरिकांनीही मुलांच्या सुरक्षिततेबाबत अधिक सतर्क राहण्याचे आवाहन करण्यात आले. यावेळी पोलीस उपअधीक्षक योगिता कुटे यांनी, घडलेल्या घटना प्रशासन आणि समाजासाठी निंदनीय असल्याचे सांगितले. महिनाभरात अशा स्वरूपाची दुसरी घटना घडणे ही गंभीर बाब असून, भविष्यात अशा घटना घडू नयेत यासाठी नागरिकांनी सतर्क राहावे. कोणतीही संशयास्पद बाब निदर्शनास आल्यास ती तत्काळ पोलिसांच्या निदर्शनास आणून द्यावी, असे आवाहन त्यांनी केले. दरम्यान, या माोर्चात सर्वधर्मीय नागरिकांनी सहभाग घेऊन आपला विरोध दर्शवला.