श्री धावीर महाराज देवघटी बसले

नवरात्रोत्सवाला उत्साहात प्रारंभ; ब्रिटिश काळापासून पोलीस मानवंदनेची परंपरा

| रोहा | प्रतिनिधी |

ब्रिटिश काळापासून पोलीस मानवंदना देण्याची परंपरा देशातील दोन देवस्थानांना लाभलेली आहे. त्यापैकी एक असलेले रायगडवासीयांचे श्रद्धास्थान आणि रोह्याचे ग्रामदैवत श्री धावीर महाराज रविवारी (दि.11) विधिवत देवघटी बसले आणि महाराजांच्या नवरात्रोत्सवाला मोठ्या उत्साहात प्रारंभ झाला.

रोहा शहराच्या पश्चिमेला हनुमान टेकडीच्या पायथ्याशी श्री धावीर महाराजांचे भव्य मंदिर आहे. मंदिराच्या गाभाऱ्यात श्री धावीर महाराज, कालिका माता, बहिरीबुवा, वाघबाप्पा आणि मागे तीनवीरा यांची स्थाने आहेत. तर मंदिराबाहेर महाराजांचे अंगरक्षक चेडा देवाचे स्थान आहे. रविवारी श्री धावीर महाराजांना विधिवत देवघटी बसविण्याच्या सोहळ्यासाठी मंदिरात रोहेकरांनी मोठी गर्दी केली होती. देवस्थानचे पुजारी वरणकर यांनी देवस्थानचे विश्वस्त, पदाधिकारी, कार्यकर्ते आणि शेकडो धावीरभक्तांच्या उपस्थितीत महाराजांकडे पारंपरिक पद्धतीने गाऱ्हाणे मांडले. गावातील सर्व भक्तांनी श्रद्धेने नवरात्रोत्सवाचे आयोजन केले असून, उत्सवादरम्यान घडणाऱ्या चुका गोड मानून घेऊन गावाचे सर्व संकटांपासून रक्षण करावे, अशी प्रार्थना त्यांनी केली.

त्यानंतर महाराजांवर अक्षतांची उधळण करण्यात आली. गोंधळ्यांच्या आरत्या, विविध वाद्यांचा गजर आणि घंटानादाने मंदिर परिसर दुमदुमून गेला. मंगलमय वातावरणात ग्रामदैवताची महाआरती संपन्न झाली आणि नवरात्रोत्सवाला उत्साहात सुरुवात झाली. यावेळी आमदार अनिकेत तटकरे, रोहा नगराध्यक्षा वनश्री शेडगे, विश्वस्त मंडळाचे अध्यक्ष ॲड. प्रशांत देशमुख, कार्यवाह मकरंद बारटक्के, उत्सव समितीचे अध्यक्ष कुमार पाशिलकर, सरचिटणीस दर्शन कदम, माजी नगराध्यक्ष समीर शेडगे, विश्वस्त नितिन परब, सुभाष राजे, समीर सकपाळ, विजयराव मोरे, आनंद कुलकर्णी, प्रकाश पवार, महेश सरदार, संदीप सरफळे, राजेंद्र जैन, आप्पा देशमुख, अमित उकडे, निलेश शिर्के, राजेश काफरे, अजित मोरे, रवींद्र चाळके, परशुराम चव्हाण, राजन पाटील, सूर्यकांत कोलाटकर, शैलेश कोळी, प्रकाश पाटणकर, वैभव साळुंखे, काशिनाथ धाटावकर, स्वप्निल धनावडे, प्रफुल्ल पडवळ, भालचंद्र पवार, प्रशांत देशमुख, आदित्य कोंडाळकर यांच्यासह विश्वस्त मंडळाचे पदाधिकारी, उत्सव समितीचे सदस्य आणि अनेक मान्यवर उपस्थित होते.

पुजारी वरणकरांनी मांडले गाऱ्हाणे
“हे धावीर महाराजा, समस्त रोहावासीय ग्रामस्थांनी श्रद्धेने आणि पारंपरिक पद्धतीने तुझा नवरात्रोत्सव मांडला आहे. या उत्सवात आमच्या हातून चांगली सेवा होईल; काही चुका झाल्यास त्या गोड मानून घे. महाराजा, तुझ्या गावाला सर्व संकटांपासून दूर ठेव आणि समस्त रोहावासीयांवर तुझी कृपादृष्टी कायम राहू दे,” असे भावपूर्ण गाऱ्हाणे यावेळी पुजारी वरणकर यांनी श्री धावीर महाराजांकडे मांडले.