बेलवलीत आढळले कुजलेले मृत अर्भक

। अलिबाग । विशेष प्रतिनिधी ।
तालुक्यातील बेलवली येथील पोलीस पाटलाच्या आंब्याच्या वाडीत अर्धवट कुजलेल्या व प्राण्यांनी खाल्लेल्या अर्धवट अवस्थेत कपड्यात बांधलेले नवजात मृत अर्भक आढळले आहे. या प्रकारामुळे बेलवली गावात खळबळ उडाली असून, हे अर्भक कोणाचे आहे याचा शोध पोलीस घेत आहेत. याबाबतचे वृत्त असे की, 12 जानेवारी रोजी दुपारी तीन वाजण्याच्या सुमारास अलिबाग तालुक्यातील बेलवली गावाच्या हद्दीत पोलीस पाटील अतुल कृष्णाजी घरत हे देखरेख करीत असलेल्या त्यांच्या भाचीच्या आंब्याच्यावाडीमध्ये कपड्यात बांधलेले काही तरी दिसून आले. संशय आल्याने अतुल घरत यांनी जवळ जाऊन बघितले असता ते अर्धवट कुजलेल्या व प्राण्यांनी खाल्लेल्या अवस्थेत कपड्यात बांधलेले नवजात मृत अर्भक असल्याचे त्यांच्या निदर्शनास आले. त्या नवजात अर्भकाच्या जिवंत जन्माला येण्यास प्रतिबंध करण्याच्या उद्देशाने किंवा त्याचे जन्मानंतर त्याचा मृत्यू घडवून आणण्याच्या उद्देशाने कोणीतरी अज्ञात व्यक्तीने ते निर्जन ठिकाणी टाकून दिले. या प्रकाराबाबत घरत यांनी तातडीने अलिबाग पोलीस ठाण्यात माहिती दिल्याने अज्ञात व्यक्तीविरोधात अलिबाग पोलीस ठाण्यात गुन्हा दाखल करण्यात आला असून, अधिक तपास महिला पोलीस उपनिरीक्षक शिंदे करीत आहेत.