डीएफपीसीएल कंपनीचा पुढाकार; 2000 हून अधिक रोजगाराची संधी
पनवेल | वार्ताहर |
पनवेल तालुक्यातील तळोजा औद्योगिक वसाहतीमधील दीपक फर्टिलायझर्स अँड पेट्रोकेमिकल्स कॉर्पोरेशन लिमिटेड (डीएफपीसीएल) ही भारतातील एक आघाडीची फर्टिलायझर्स अँड इंडस्ट्रिअल केमिकल्स उत्पादक कंपनी महाराष्ट्रातील रायगड जिल्ह्यात नवा अमोनिया उत्पादक प्लांट उभा करत आहे. भारत सरकारचा ’आत्मनिर्भर भारत’ हा दृष्टिकोन अंगिकारणारा हा नवा प्रकल्प महाराष्ट्र सरकारच्या ’मॅग्नेटिक महाराष्ट्र’ उपक्रमाशीही मेळ खातो. देशातील अन्नसाखळी सुरक्षित करण्यात हा प्लांट फार महत्त्वाचा ठरणार आहे. कारण अमोनिया हा खतांमधील एक महत्त्वाचा घटक असतो. शिवाय यामुळे देशाचे अमोनिया आयातीवरील अवलंबित्वही 25 टक्क्यांनी कमी होऊ शकेल.
डीएफपीसीएल ही एक अत्यंत जबाबदार कॉर्पोरेट कंपनी आपल्या सर्व प्लांट्सच्या, यात तळोजाही आहेच, आसपास असणार्या स्थानिक समुदायांच्या उन्नतीसाठी प्रयत्न करत असते. या विकासात्मक वाटचालीत नव्या प्रकल्पामुळे लोकांना 2000 हून अधिक रोजगारसंधी उपलब्ध होतील. तसेच हा अमोनिया प्लांट सुरू झाला की यातून स्थानिक समुदायासाठी जवळपास 300 कायमस्वरुपी नोकर्या आणि इतर अनेक अप्रत्यक्ष रोजगार उपलब्ध होतील.
कृषी, फार्मास्युटिकल्स, खाणकाम, पायाभूत सुविधा अशा अर्थव्यवस्थेतील महत्त्वाच्या क्षेत्रांना चालना देत आम्ही गेल्या 40 वर्षांपासून राष्ट्रउभारणीच्या कामात सहभाग नोंदवत आहोत. आमचे कर्मचारी आणि आसपासच्या समुदायांचे आरोग्य आणि सुरक्षा जपण्यासाठी आम्ही शक्य तितक्या उच्च पातळीवरील पर्यावरण आणि उत्सर्जन नियमांचे पालन करतो, असे डीएफपीसीएलच्या उत्पादन विभागाचे अध्यक्ष डीएसआर राजू म्हणाले. प्रोजेक्ट्स विभागाचे अध्यक्ष अरुण विजय म्हणाले, या प्रकल्पासाठी सर्वोत्कृष्ट उपलब्ध तंत्रज्ञान अवलंबून कंपनीने हा प्रकल्प अत्यंत ऊर्जासक्षम बनवला आहे. यात भारत तसेच जगभरातील पर्यावरण आणि सुरक्षा संबंधीच्या कठोर नियमांचे पालन केले गेले आहे. यामुळे या प्रकल्पाच्या आसपास असलेल्या स्थानिक समुदारासोबतच पर्यावरणाच्या सुरक्षेची खातरजमा होणार आहे.
वाहतुकीची समस्या मिटणार
या प्रकल्पात बंदर ते कारखान्यादरम्यानच्या 70,000 हून अधिक अमोनिया टँकर्सची वाहतूक टाळून भूपातळीवरील प्रदुषण कमी केले जाणार आहे. या प्रकल्पात उत्पादित होणारा अमोनिया पाइपलाइनच्या माध्यमातून वाहून नेला जाणार आहे. अमोनिया टँकर्स बंद झाल्याने एमआयडीसी परिसरातील वाहतुकीची कोंडीही कमी होईल