सवाद,कालवली रस्त्याची दुरवस्था

। पोलादपूर। प्रतिनिधी ।
तालुक्यातील सवाद ते कालवली पर्यंतच्या रस्त्याची सध्या प्रचंड दूरवस्था झाली असून या दूर्दशेवर उपाययोजना तसेच तातडीची दुरूस्ती करण्याऐवजी भोराव ते निगडे असा हा रस्ता ठरवून महाड सार्वजनिक बांधकाम विभागाकडे हा रस्ता वर्ग करीत पोलादपूर सार्वजनिक बांधकाम उपविभागाकडून हा रस्ता काढून घेण्यात आला आहे. त्यामुळे रस्ता निविदा प्रक्रियेत असताना या रस्त्याची दुरूस्तीदेखील पोलादपूर उपविभागाकडून करण्यात येणार नसल्याने नवीन पेच निर्माण झाला आहे.
पोलादपूर तालुक्यातील असूनही निविदेमध्ये महाड तालुका असा उल्लेख करण्यात आल्याने या रस्त्याच्या तातडीने दुरूस्तीसाठी सामाजिक कार्यकर्ते अब्दुलहक खलफे यांनी येत्या 5 मे 2022 रोजी पोलादपूर तहसिल कार्यालयासमोर उपोषणाला बसण्याचे लेखी निवेदन दिले असता सदरचे उपोषण टाळण्यासाठी सार्वजनिक बांधकाम विभागाकडून रस्त्यांची मलमपट्टी सुरू करण्यात आली आहे.
पोलादपूर तालुक्यातील माटवण, सवाद, कणगुले, वावे, धारवली, कालवली, हावरे या सात गावांसाठी हा रस्ता आवश्यक असताना तो महाड तालुक्यातील राजेवाडी ते भोर घाटरस्त्यावरील भोराव फाटयापासून सुरू झाला आहे म्हणून धारवली आंग्रेकोंड येथून निगडे या महाड तालुक्यातील वरंध घाटापर्यंत नेण्याचा प्रस्ताव महाड सार्वजनिक बांधकाम विभागाकडून तयार करण्यात येऊन तालुकादेखील महाड असा दाखविण्यात आला आहे, ही बाब पोलादपूर तालुक्याच्या अस्मितेसाठी संतापजनक असूनही मोठया राजकीय हस्तक्षेपामुळे यास पक्षसंघटनेचेही समर्थन मिळत आहे. सद्यस्थितीत हा नियोजित रस्ता सुमारे 8 कोटी निविदेचा असताना पोलादपूर तालुक्यातील माटवण ते कालवली या सप्तक्रोशीतील मूळरस्त्यावर दुरूस्तीसाठी खडीकरण व डांबरीकरण करण्यासाठी पोलादपूर सार्वजनिक बांधकाम उपविभाग धजावत नसल्याचे दिसून येत आहे.
माटवण ते कालवलीपर्यंतच्या रस्त्याची दुरूस्ती पावसाळयापूर्वी न झाल्यास सप्तक्रोशीतील ग्रामस्थांचे पुढील चार महिने अतोनात हाल होणार असल्याने सामाजिक कार्यकर्ते अब्दुलहक खलफे यांनी पोलादपूर तहसिल कार्यालयाला निवेदनाद्वारे येत्या दि.5 मे 2022 रोजी तहसिल कार्यालयासमोर एकदिवसीय लाक्षणिक उपोषण करण्याचा इशारा दिल्यानुसार या रस्त्यावर सोमवारपासून खड्डे बुजविण्याच्या कामाची तातडीने सुरूवात झाली असल्याने आता सामाजिक कार्यकर्ते अब्दुलहक खलफे यांच्या उपोषणाचा निर्णय ते मागे घेतात अथवा कसे हे सार्वजनिक बांधकाम विभागाकडून सुरू असलेली मलमपट्टी पूर्ण करण्यात येणार आहे, अथवा कसे यावर अवलंबून आहे.