गावोगावी रंगू लागल्या क्रिकेट, कबड्डीच्या प्रीमियर लीग

लाखोंची बक्षिसे; मोठ्या चषकांना मागणी, क्रीडाप्रेमींना पर्वणी
। पाली/बेणसे । प्रतिनिधी ।
रायगड जिल्हा कबड्डीचे माहेरघर व पंढरी म्हणून ओळखला जातो. या मातीत असंख्य मातब्बर कबड्डीपटू उदयाला आले आहेत. याबरोबर येथील लहानग्यांसह मोठ्यांनादेखील क्रिकेटचे प्रचंड प्रेम आहे. सध्या जिल्ह्यातील गावागावात अगदी गल्लीबोळातदेखील क्रिकेट आणि कबड्डीच्या प्रीमियर लीग रंगू लागल्या आहेत. येथे हजारो लाखो रुपयांची बक्षिसे दिली जात आहेत. शिवाय, मोठ्या चषकांनादेखील अधिक मागणी आहे. त्यामुळे क्रीडाप्रेमी व रसिकांच्या आनंदाला उधाण आले आहे. शिवाय, यामुळे स्थानिक अर्थव्यवस्थेला चालना व गतीदेखील मिळत आहे.

या प्रीमियर लीग पक्षाच्या किंवा त्या गावाच्या किंवा शहराच्या नावाने अगदी एखाद्या आळीच्या किंवा मंडळाच्या नावाने, तसेच एखाद्या व्यक्तीच्या समरणार्थ भरविल्या जात आहेत. वाढत उष्मा पाहता रात्रीच्या स्पर्धा अधिक भरविल्या जातात. गावातील सरपंच ते मोठा नेता व पुढारी यासाठी बक्षिसांची रक्कम किंवा पूर्ण स्पर्धेचे आयोजन करतात. गावागावातील मैदाने किंवा शेतात स्पर्धा भरविल्या जातात. त्यासाठी मंडप बांधले जातात. सोबत डीजेदेखील लावला जातो. चांगले निवेदक बोलविले जातात. राष्ट्रीय व आंतरराष्ट्रीय दर्जाचे पंच यासाठी नेमले जातात. एकूणच, सर्व कार्यक्रम भारदस्त केले जात आहेत. या लोकांनादेखील रोजगाराची संधी मिळत आहे. तसेच यावेळी मंडप व डेकोरेशनवाले, वडापाववाले, सरबत, पाणीवाले आदी व्यावसायिक व विक्रेत्यांनादेखील चांगला धंदा मिळतो. आयोजकांच्या नावाचे व लोगो असलेले विविध टी शर्ट छपाई केली जाते. चषक विक्रेत्यांचादेखील चांगला व्यवसाय होत आहे. एकूणच, या प्रीमियर लीगमुळे जणूकाही गाव खेड्यातील अर्थव्यवस्थेला उभारी आणि चालनासुद्धा मिळत आहे.

बक्षिसांची खैरात
या प्रीमियर लीगमध्ये प्रथम, द्वितीय, तृतीय व उत्तेजनार्थ अशा टीमना पारितोषिक व रोख रक्कम मिळतेच. शिवाय, उत्कृष्ट गोलंदाज, फलंदाज, यष्टीरक्षक, फिल्डर, उत्कृष्ट चढाई आदी खेळाडूंनादेखील रोख पारितोषिक व चषक दिले जाते. शिवाय स्पर्धेदरम्यानदेखील चौकर, षटकार मारणार्‍या व उत्कृष्ट चढाई करणार्‍या खेळाडूला रोख रक्कम दिली जाते.

मोठ्या नेत्यांसह स्थानिक पुढार्‍यांची उपस्थिती
गावोगावी होणार्‍या कबड्डी व क्रिकेटच्या प्रिमियर लीगमुळे स्थानिक पुढार्‍यांसह मोठे नेते, आमदार यांनादेखील प्रसिद्धीसाठी हक्काचे आंदण मिळत आहे. कार्यक्रम पत्रिकेत प्रमुख अतिथी उपस्थिती यामध्ये हे नेते व पुढारी यांची नावे आवर्जून असतात. शिवाय, त्यांच्याकडून आयोजकांना भरघोस बक्षिसे व पारितोषिकेदेखील दिली जातात. या प्रीमियर लीगचे उद्घाटन आणि बक्षीस समारंभावेळी आवर्जून हे नेतेमंडळी आणि पुढारी उपस्थित राहतात. मात्र, अशा वेळी काही ठिकाणी भिन्नभिन्न पक्षांचे पुढारी व नेते यांच्यामध्ये राजकारण व चढाओढदेखील रंगलेले पाहायला मिळते.

मोठ्या चषकांना मागणी
जिल्ह्यात सध्या मोठ्या चषकांना मागणी वाढली आहे. प्रीमियर लीगच्या कार्यक्रम पत्रिकेतदेखील भव्य चषकाचा आवर्जून उल्लेख केलेला आढळतो. अगदी कमी रकमेच्या स्पर्धेतसुद्धा भव्य चषक पहायला मिळतो. परिणामी, चषक विक्रेतेदेखील सुखावले आहेत, असे चषक विक्रेते मुकुंद कोसुंबकर यांनी सांगितले.

गावखेड्यातील होतकरू व प्रतिभावंत खेळाडूंना या प्रीमियर लीगद्वारे हक्काचे व्यासपीठ मिळत आहेत. यातून काही खेळाडूंना राज्य, देश व राष्ट्रीय पातळीवर जाण्याची संधीदेखील मिळू शकेल. या स्पर्धांद्वारे युवक व तरुणांमध्ये विविध कौशल्य व क्षमता विकसित होतात. मात्र, त्यांनी खेळाबरोबरच अभ्यास व करिअरकडेसुद्धा तेवढेच लक्ष दिले पाहिजे.

– प्रीमियर लीग आयोजक, सुधागड