माणगाव पं.स. तर्फे कृषीदिनी वृक्षारोपण

। माणगाव । प्रतिनिधी ।
कृषी विभाग माणगाव व पंचायत समिती माणगाव यांच्या संयुक्त विद्यमानो माणगाव येथे कृषी दिन साजरा करण्यात आला. 

यावेळी कृषी अधिकारी बी. व्ही. काप  यांनी वसंतराव नाईक यांच्या कृषी क्षेत्रातील योगदानाबद्दल प्रास्ताविक केले, उपस्थित शेतकर्‍यांना कृषि दिनाचे महत्व व पंचायत समिती अंतर्गत कृषि विभागाचे विविध योजना याबद्दल माहिती दिली,  तसेच  तालुका कृषी अधिकारी आर.डी. पवार यांनी  कृषी संजीवनी मोहिमेअंतर्गत तालुक्यांमध्ये  110 गावांमध्ये व 1667  शेतकर्‍यांना बांधावर जाऊन मार्गदर्शन करण्यात आले.

गट विकास अधिकारी वाय. एम. प्रभे यांनी उपस्थित शेतकर्‍यांना आधुनिक तंत्रज्ञानाचा अवलंब करून शेती करण्याबाबत मार्गदर्शन केले, यावेळी  तालुक्यातील सन 2021-22 या वर्षातील भात पीक स्पर्धेतील विजेते बापू बक्कम कोशिंबळे (प्रथम), सोमनाथ पास्टे, मुर(दुत्तीय) श्रीकांत हाटे, नागाव (तृतीय) व तालुक्यांमध्ये नाचणी पिकामध्ये विक्रमी उत्पादन घेणारे राजू तेलंगे मौंजे कुंभे यांना प्रमाणपत्र देऊन सन्मानित करण्यात आले.
     

आत्मा अंतर्गत नवीन नोंदणी करण्यात आलेल्या नवतरुण शेतकरी गट, दहीवली या गटाला नोंदणी प्रमाणपत्र देण्यात सन्मानित करण्यात आले. तसेच तालुक्यातील महिला शेतकरी गट यांना परसबागेतील भाजीपाला लागवड करण्यासाठी भाजीपाला बियाणे किट वाटप करण्यात आले. या नंतर गट विकास अधिकारी वाय. एम. प्रभे यांच्या हस्ते कृषी दिनानिमित्ताने पंचायत समितीचे आवारामध्ये वृक्ष लागवड करुन  कार्यक्रमाची सांगता करण्यात आली. यावेळी कृषी विस्तार अधिकारी बी. व्ही. काप, अशोक मार्कड विस्तार अधिकारी, प्रमोद शिंदे तंत्रज्ञान व्यवस्थापक आत्मा, मंडळ कृषी अधिकारी गोरेगाव किरण पडळकर, व कृषी विभागाचे कर्मचारी उपस्थित होते.