प्लास्टिक वस्तूंऐवजी पर्यावरणपूरक वाणाचे वाटप

| सुधागड -पाली । वार्ताहर ।

मकर संक्रांतीनिमित्त ठिकठिकाणी हळदी-कुंकू कार्यक्रमांचे आयोजन केले जाते. या कार्यक्रमात महिलांची ओटी भरून त्यांना वाण देण्याची प्रथा असते. मात्र मागील काही वर्षे पर्यावरण विघातक प्लास्टिकच्या वस्तूंचे वाण वाटप करणे वाढले आहे. परिणामी आता काही सुज्ञ महिला पर्यावरण पूरक हळदीकुंकू साजरा करण्यावर भर देत आहेत. प्लास्टिक सोडा, कापडी व गोणपाटाच्या म्हणजेच ज्यूटच्या पिशवीशी नाते जोडा असाच संदेश दिला जातांना दिसतोय.

मागील दोन वर्षे कोरोनाचे निर्बंध असल्याने हळदीकुंकू कार्यक्रम थोडक्यात साजरे झाले. मात्र यंदा कोणतेच निर्बंध नसल्याने हळदीकुंकू कार्यक्रम मोठ्या प्रमाणात साजरे होणार आहेत. परिणामी अनेक गृहिणी, महिला मंडळे व राजकीय पक्ष यासाठी सज्ज झाले आहेत. माणगाव तालुक्यातील विळे येथील गृहिणी स्वाती मुंडे यांनी हळदीकुंकू पर्यावरण स्नेही पद्धतीने साजरा करण्याचा निर्णय घेतला आहे. त्या बाजारात उपलब्ध असलेल्या ज्यूटच्या कापडाच्या म्हणजेच गोणपाटाच्या कापडाच्या पिशव्या वाण म्हणून देणार आहेत.

दोन वर्षांपूर्वी सुधागड तालुक्यातील पायरीचीवाडी शाळेत आयोजित हळदी कुंकू कार्यक्रमात महिलांना छानसे रोप व कापडी पिशव्या वाटप करत अनोखा व विधायक पर्यावरणपूरक हळदी-कुंकू समारंभ साजरा करण्यात आला होता. तत्कालीन मुख्याध्यापक कुणाल पवार यांनी हा उपक्रम राबविला होता.

उत्तम पर्याय
बाजारात कोणत्याही छोट्या मोठ्या वस्तू खरेदी केल्या कि आपसूकच दुकानदार प्लास्टिकची पिशवी देतो किंवा ती आवर्जून मागितली जाते. परिणामी मोठ्या प्रमाणात पर्यावरण प्रदूषित होतांना दिसत आहे. तसेच वाण म्हणून मिळणारी वस्तू कोणाची मोठी व चांगली आहे यावरून महिलांची स्पर्धा पहावयास मिळत असते. यात प्लास्टिकच्या वस्तू थोड्या स्वस्तात आणि आपल्याला हव्या तशा मिळत असल्याने महिलांचाही त्या खरेदीकडे ओढा असतो. त्यामुळे सर्वांना प्लास्टिक वस्तू व पिशवीला सोपा व टिकाऊ पर्याय देणे आवश्यक आहे. त्यासाठी कापडी व ज्यूटच्या कापडाच्या पिशव्या उत्तम पर्याय आहे. आणि मकरसंक्रांत निमित्त महिलांना या टिकाऊ व आकर्षक पिशव्या वाण म्हणून दिल्यास त्या त्यांना सहज उपलब्ध होतील व वापरता देखील येतील आणि आपोआप प्लास्टिक पिशव्या हद्दपार होतील.

भारतीय सण आणि निसर्ग यांचे अतूट आहे. यासाठी एक छोटेसे पाऊल उचलले आहे. हळदीकुंकू कार्यक्रमाला वाण म्हणून ज्यूटच्या आकर्षक पिशव्या वाटणार आहे. आठवडा बाजारातून त्यांची आगाऊ खरेदी केली आहे. या पर्यावरण स्नेही सुंदर पिशव्या किमान 15 ते 20 घरात जाणार आहेत आणि प्रत्येक घरातील व्यक्ती या पिशव्यांचा वापर करतील आणि प्लास्टिक पिशवीचा वापर आपोआप कमी होण्यास मदत होईल.

स्वाती मुंडे,
गृहिणी, विळे

पर्यावरण स्नेही ज्यूटच्या या रंगीबेरंगी, नक्षीकाम असलेल्या आकर्षक, स्वस्त व टिकाऊ पिशव्या खरच उपयुक्त आहेत. आकारावरून अगदी 50 रुपयांपासून पुढे मिळतात. विशेष म्हणजे बाजारात त्या सहज उपलब्ध होत आहेत. संक्रांतीच्या निमित्ताने कुटुंबातील सदस्य व मित्रपरिवाराला भेट म्हणून देत आहे.

सीमा वाघपंजे
शिक्षिका, श्रीवर्धन