बाधित शेतकर्यांची मागणी
| उरण | वार्ताहर |
उरण ते उसर अशी गेल गॅस अथॉरिटी ऑफ इंडिया यांच्या वायू वाहिनीसाठी भूसंपादन करताना पारदर्शकता आणावी, अशी मागणी रविवारी मोठी जुई येथे झालेल्या बाधित शेतकर्यांच्या बैठकीत करण्यात आली आहे. यावेळी जिल्हाधिकारी यांनी याची दक्षता घेऊन योग्य तो निर्णय न घेतल्यास 26 जानेवारी या प्रजासत्ताकदिनी शेतकरी आंदोलन करतील, असा इशाराही यावेळी देण्यात आला आहे.
शेतकर्यांनी वेळीच सावध व संघटित होऊन आपले न्याय्य हक्क मिळविण्यासाठी संघर्षाची तयारी करा, असे आवाहन या बैठकीत करण्यात आले आहे. यामध्ये भूसंपादन अधिकारी नेमणूक अधिसूचना, कोणत्या कायद्याने भूसंपादन होणार, किती मोबदला मिळणार ते स्पष्ट करण्याची मागणी यानिमित्ताने शेतकर्यांनी केली आहे. उरण, पनवेल, पेण व अलिबाग तालुक्यातील अनेक गावांमधून गेल कंपनीची प्रोपेनची वायूवाहिनी अलिबाग-उसर प्रकल्पाकरिता टाकली जाणार आहे. याकरिता शेतकर्यांच्या जमिनीचे संपादन होणार आहे. मात्र, जमिनीची किंमत फक्त दहा टक्केच देणार असल्याचे भूसंपादन अधिकारी यांनी स्पष्ट केले आहे. नोकरी देण्यासंबंधी काही स्पष्टता दिली जात नाही. मात्र, एकदा का सातबारा उतार्यावर पाईपलाईनची नोंद झाली की त्या जमिनीचा वापर फक्त भातशेतीसाठी होणार आहे. शेतीव्यतिरिक्त काहीही करता येणार नाही. भूसंपादन अधिकार्यांनी उरण तालुक्यातील सुनावणीचा फार्स झाला, योग्य पद्धतीने सुनावणी घेतली गेली नाही.
किसान सभेचे अध्यक्ष रामचंद्र म्हात्रे, कायदेविषयक अभ्यासक अभिजीत पाटील यांनी यावेळी मार्गदर्शन केले. तर, माजी पंचायत समिती सदस्य रमाकांत पाटील, संजय ठाकूर, राजेंद्र ठाकूर, महेश पाटील, मच्छिंद्र भोईर, नंदकुमार तांडेल यांनी शेतकर्यांना 26 जानेवारीला मोठ्या संख्येने उपस्थित राहण्याचे आवाहन केले आहे.