अलिशान सोगांव क्रिकेट स्पर्धा

शिवसाई मापगांव संघ विजयी

| सोगांव | वार्ताहर |

अलिबाग तालुक्यातील सोगांव येथे मरहुम सुजाऊद्दिन काझी पुरस्कृत अलिशान कप  प्रकाशझोतातील क्रिकेट स्पर्धा नुकत्याच आयोजित करण्यात आल्या होत्या.
स्पर्धेत अंतिम सामना शिवसाई मापगाव संघ व कुबेर 11 अलिबाग संघ यांच्यात होऊन अटीतटीच्या लढतीत  शिवसाई मापगांव संघाने बाजी मारत प्रथम क्रमांक दीड लाखांचे बक्षिस व भव्य चषक पटकावत अलिशान कप 2023 वर आपले नाव कोरले, कुबेर 11 अलिबाग संघाला द्वितीय क्रमांक 80,000 व चषक यावर आपले समाधान मानावे लागले, तसेच तृतीय क्रमांक जय मल्हार अलिबाग संघाने पटकावला.

स्पर्धेमध्ये उत्कृष्ट फलंदाजाचा मान रोहित पाटील – कुबेर 11 अलिबाग संघ याने पटकावला, तर उत्कृष्ट गोलंदाजचा मान प्रणित वरसोलकर – जय मल्हार अलिबाग संघ याने पटकावला, तसेच स्पर्धेतील सर्वोत्कृष्ट खेळाडूचा मान म्हणून स्वस्तिक म्हात्रे – शिवसाई मापगांव याला देण्यात आला. या सर्व विजेत्या संघांना व उत्कृष्ट कामगिरी करणार्‍या खेळाडूंना सोगांव येथील ज्येष्ठ नागरिक कुतबुद्दीन कप्तान, मंडळाचे उपाध्यक्ष मजीद कुर, जमातुल मुस्लिमीन सोगावचे उपाध्यक्ष मन्सूर कुर, मैनुद्दीन अन्सारी, वजीर वाकनिस, मुरतुजा कुर, नवाज आराई, अखलाख वाकनिस, रईस हाफिज, अखलाख कप्तान,  सामाजिक कार्यकर्ते सचिन घाडी, जाकीर कुर, साहिल कुर आदी मान्यवरांच्याहस्ते पुरस्कार व चषक देऊन गौरविण्यात आले.

स्पर्धेत समालोचन व सूत्रसंचालन म्हणून काका म्हात्रे सर, लाईक कप्तान, सुहास फाटक, विकास साखरकर, सुदर्शन घातकी, यश मापगावकर, नदीम वाकनिस यांनी उत्तमरीत्या करत मान्यवरांची व क्रिकेटप्रेमींची मने जिंकली. स्पर्धा पाहण्यासाठी क्रिकेट प्रेमींनी मोठ्या प्रमाणात गर्दी केली होती, तसेच स्पर्धा घर बसल्या पाहता याव्यात यासाठी युट्यूब वर थेट प्रक्षेपण करण्यात आले होते. स्पर्धा यशस्वी होण्यासाठी अलिशान मंडळाने व  सोगांव ग्रामस्थांनी विशेष मेहनत घेतली.