| पनवेल | वार्ताहर |
लग्नास नकार देणाऱ्या तरुणीवर प्रियकाराने चाकुने सपासप वार करुन तिला ठार मारण्याचा प्रयत्न केल्याची खळबळजनक घटना नवीन पनवेलमध्ये घडली आहे. या हल्ल्यात तरुणी गंभीर जखमी झाली असून तिला उपचारासाठी एमजीएम हॉस्पीटलमध्ये दाखल करण्यात आले आहे. सदर घटनेनंतर खांदेश्वर पोलिसांनी सदर तरुणीचा प्रियकर भगवान खेळू कजबळे (29) याच्या विरोधात प्राणघातक हल्ला केल्याप्रकरणी गुन्हा दाखल करुन त्याला अटक केली आहे.
या घटनेत प्रियकराच्या हल्ल्यात गंभीर जखमी झालेल्या तरुणीचे नाव सविता (23) असे असून ती कामोठेत राहण्यास आहे. तसेच ती नवीन पनवेल मधील ब्युटी सेंटरमध्ये कामाला आहे. तर तिच्यावर प्राणघातक हल्ला करणारा तिचा प्रियकर भगवान खेळू कजबळे खांदेश्वर भागात राहण्यास आहे. भगवान देखील पूर्वी सविता काम करत असलेल्या ब्युटी सेंटरमध्ये काम करत होता. मात्र, काही महिन्यापूर्वीच त्याला कामावरुन काढून टाकण्यात आले होते. तेव्हापासून भगवान बेकार होता. भगवान आणि सविता या दोघांमध्ये मागील साडे तीन वर्षापासून प्रेमसंबंध सुरु होते. मात्र, मागील दिड महिन्यापासून भगवान सवितावर संशय घेत होता. त्यामुळे सविताने त्याच्यासोबत लग्न करण्यास नकार दिला होता. त्यामुळे भगवान सविताला त्रास देऊन तिला मारुन टाकण्याची धमकी देत होता. 16 जुलै रोजी सविता नेहमीप्रमाणे कामावर गेली होती. दुपारी अडीच वाजण्याच्या सुमारास दुकानाचा मालक कल्पेश जेवण्यासाठी गेल्यानंतर सविता दुकानात एकटीच होती. त्यावेळी भगवान दुकानावर गेला होता. त्यानंतर त्याने सवितासोबत वाद घालून तिचा मोबाईल फोन खाली आपटून दिला. त्यानंतर त्याने चाकुने सविताच्या हातावर, मानेवर, गळ्यावर आणि तोंडावर सपासप वार केले. त्यानंतर त्याने सविताच्या मानेवर चाकू खुपसून तेथून पलायन केले. या हल्ल्यात सविता रक्तबंबाळ होऊन गंभीर जखमी झाल्याने तिने त्याच अवस्थेत शेजारच्या दुकानात धाव घेतली. त्यानंतर दुकानदारांनी तिला एमजीएम हॉस्पीटलमध्ये दाखल केले. सदर घटनेची माहिती मिळताच खांदेश्वर पोलिसांनी आरोपी भगवान कजबळे याच्या विरोधात ठार मारण्याचा प्रयत्न केल्याप्रकरणी गुन्हा दाखल करून त्याला अटक केली आहे.