“..तर, शेकडो प्राण वाचले असते”, मनसेचे ट्वीट चर्चेत

| अलिबाग | विशेष प्रतिनिधी |

इर्शाळवाडीच्या घटनेवरून महाराष्ट्र नवनिर्माण सेनेने सरकार आणि प्रशासनाच्या कारभारावर बोट ठेवलं आहे. गेल्या आठवड्यात रायगडच्या खालापूर तालुक्यातील इर्शाळवाडी गावात दरड कोसळून मोठी हानी झाली. या दरड दुर्घटनेत 27हून अधिक लोकांच्या बळी गेला. तसेच, मोठ्या प्रमाणात वित्तहानीदेखील झाली आहे. खालापूरमधील इर्शाळगडाच्या पायथ्याशी वसलेली इर्शाळवाडी 19 जुलैच्या रात्री दरड कोसळून काळाच्या उदरात गडप झाली. या घटनेुळे संपूर्ण राज्याला मोठा हादरा बसला आहे. या दुर्घटनेनंतर सरकार आणि विरोधक आमने-सामने आल्याचं पाहायला मिळालं. पावसाळ्याआधीच इर्शाळवाडीसह दरडप्रवण भागांमधील लोकांचं स्थलांतर करायला हवं होतं, अशी टीका विरोधकांकडून सुरू आहे.

दरम्यान, महाराष्ट्र नवनिर्माण सेनेने एक ट्वीट करून आताच्या आणि आधीच्या सरकारला धारेवर धरलं आहे. मनसेने केलेल्या ट्वीटनुसार इर्शाळवाडीतल्या ग्रामस्थांनी आठवर्षांपूर्वीच रायगड जिल्ह्याधिकाऱ्यांना पत्र लिहून माळीण गावासारखे संकट आमच्यावरही कोसळू शकतं, त्यामुळे आमच्या वाडीचं चौक सर्व्हे क्र. 24 येथे पुनर्वसन करा, अशी मागणी केली होती. परंतु आठ वर्षात यावर कुठल्याही प्रकारची कार्यवाही झाली नाही. परिणामी राज्याला इतक्या मोठ्या दुर्घटनेला सामोरं जावं लागलं.

मनसेने केलेल्या ट्वीटमध्ये म्हटलं आहे की, धक्कादायक! 25 जून 2015 रोजी इर्शाळवाडी ग्रामस्थांनी रायगड जिल्ह्याधिकाऱ्यांना पत्र लिहून कळवलं होतं की, ‘माळीण गावासारखे संकट आमच्यावरही कोसळू शकतं, त्यामुळे आमच्या वाडीचं चौक सर्व्हे क्र. २४ येथे पुनर्वसन करा.’ 2015 साली किंवा त्यानंतर या पत्राची दखल घेतली गेली असती तर आज शेकडो प्राण वाचले असते आणि ग्रामस्थ सुरक्षित नांदले असते. शासन-प्रशासनांनी तत्परता आणि संवेदनशीलता दाखवली नाही तर समाजाला केवढी मोठी किंमत चुकवावी लागते, त्याचं हे जीवघेणं उदाहरण!

दरम्यान, गेल्या महिन्यात कोकण दौऱ्यावर असताना मनसे अध्यक्ष राज ठाकरे यांनी एका भाषणात कोकणात पावसाळ्यात दरडी कोसळतील, त्यामुळे प्रशासनाने सजग असावं असा इशारा दिला होता. मनसेने त्यावरही एक ट्वीट केलं होतं. त्यात म्हटलं होतं की, 11 जून रोजी राज ठाकरे यांनी सांगितलेलं, यावर्षी कोकणात मोठ्या प्रमाणावर दरडी कोसळतील असं दिसतंय, शासन-प्रशासनाने जागृत राहावं. 20 जुलै रोजी रायगडच्या इर्शाळवाडीवर मध्यरात्री दरड कोसळणं आणि अख्खं गाव जमीनदोस्त होणं, माणसं दगावणं हे अतिशय वेदनादायी आहे.