विजयी मिरवणूक आली अंगाशी; गुन्हा दाखल

| महाड | प्रतिनिधी |

महाड तालुक्यातील खरवली ग्रामपंचायत निवडणुकीमध्ये विजय मिळवल्यानंतर काढलेली विजयी मिरवणूक खरवलीचे नवनिर्वाचित सरपंच, काही सदस्य तसेच महाविकास आघाडीच्या कार्यकर्त्याच्या चांगली अंगाशी आली आहे. विनापरवाना मिरवणूक काढून पोलीस अधिकार्‍याला धमकवल्याप्रकरणी अकरा जणांवर महाड औद्योगिक पोलीस ठाण्यात गुन्हा दाखल करण्यात आला आहे.

खरवली ग्रामपंचायतीचा निवडणूक निकाल रविवारी जाहीर करण्यात आला. या निवडणुकीत आमदार भरत गोगावले यांनी ग्रामपंचायतीत बहुमत मिळवले, परंतु सरपंच पद मात्र गमावले. आमदार भरत गोगावले यांना धक्का दिल्यानंतर महाविकास आघाडीचे विजयी झालेले सरपंच आणि तीन विजयी उमेदवारांनी आनंदाच्या भरामध्ये एमआयडीसी नडगाव ते काळीज या ठिकाणापर्यंत रविवारी दुपारी एक ते तीन ढोल ताशाच्या गजरात, घोषणाबाजी करत तसेच फटाक्यांची आतषबाजी करत विनापरवाना मिरवणूक काढली. जिल्हाधिकारी यांचे मनाई आदेश असतानाही या मनाई आदेशाचे तसेच आचारसंहितांचे उल्लंघन करून सरपंच चैतन्य म्हामुणकर व इतर सदस्य व कार्यकर्त्यांनी मिरवणूक काढत आपला आनंद साजरा केला.

याच दरम्यान महाड एमआयडीसी पोलीस ठाण्याचे पोलीस निरीक्षक मारुती आंधळे यांना देखील या सर्वांकडून धमकावण्यात आले. त्यामुळे पोलिस शिपाई मढवी यानी एमआयडीसी पोलीस ठाण्यामध्ये फिर्याद दाखल केली असून खरवली चे नवनिर्वाचित सरपंच चैतन्य म्हामुणकर, सदस्य रवींद्र नलावडे, रेखा सकपाळ व श्रुतीका म्हस्के, काँग्रेसचे तालुका अध्यक्ष राजेंद्र कोरपे, जिल्हा उपाध्यक्ष धनंजय देशमुख, जगदीश पवार, राष्ट्रवादी काँग्रेसचे सोनल उत्तेकर तसेच नितीन सकपाळ, बाळा सकपाळ व अमोल मस्के यांच्यासह इतर कार्यकर्त्यांवर गुन्हा दाखल करण्यात आला आहे. या प्रकरणी पोलीस निरीक्षक मारुती आंधळे अधिक तपास करत आहेत.