ओढ्यात आढळली मगर

। रायगड । प्रतिनिधी ।

म्हसळा तालुक्यातील पाबरे गावाच्या जवळ एका ओढ्यामध्ये बुधवारी (दि. 23) तब्बल 13.4 फूट लांब व साधारण 230 किलो वजनी मगर आढळली. या मगरीला वनविभाग व सह्याद्री वन्यजीव रक्षणार्थ सामाजिक संस्थेच्या सदस्यांनी सुखरूप रेस्न्यू केले.

बुधवारी सकाळी साधारण 10:30 च्या सुमारास म्हसळा येथून सह्याद्री वन्यजीव रक्षणार्थ सामाजिक संस्थेच्या सदस्यांना वन विभागाचा फोन आला त्यांनी मगर आल्याची माहिती दिली. माहिती मिळताच सह्याद्री वन्यजीव रक्षणार्थ सामाजिक संस्था घटनास्थळी जाण्यासाठी निघाली. एका तासाभरात टीम घटनास्थळी पोहोचली व बचाव कार्य सुरू करण्यात आले. मगरीचा आकार मोठा असल्याने बचाव कार्य करण्यासाठी योग्य नियोजन व खबरदारी घेण्यात आली. आणि शिताफीने बचाव कार्य करण्यात आले. वनविभाग व टीमने अगदी सुखरूपणे त्या मगरीला पकडले.