कर्जतच्या चौदा वर्षीय बालकाने स्वीकारला संन्यास

| कर्जत | प्रतिनिधी |
कर्जत शहरातील महावीर पेठे मध्ये राहणारे योगेश मांगीलाल ओसवाल यांचा सुपुत्र कु. कलश ओसवाल हा चौदाव्या वर्षी दीक्षा घेऊन संन्यास स्वीकारणार आहे. त्याची वरघोडा मिरवणूक कर्जत शहरातून वाजत – गाजत काढून समारंभ ठिकाणी नेली. कलश हा रायगड जिल्ह्यातील पहिला बाल दिक्षार्थी ठरणार आहे. या ऐतिहासिक घटनेचे साक्षीदार म्हणून विविध राज्यातून भाविक उपस्थित राहिले असून गुरुवारी ( 29 डिसेंबर ) दीक्षा समारंभ पूर्ण झाला आहे.

शहरातील सामाजिक कार्यकर्ते स्वर्गीय मांगीलाल भुरमल ओसवाल यांचा नातू कलश याला लहानपणापासूनच परमार्थाची आवड होती. त्यातच ते राहतात त्याच्या शेजारीच पुण्योदय हे जैन साध्वी व जैन मुनींचे विश्रांतीस्थान आहे. तसेच निवसस्थानासमोरच जैन मंदिर असल्याने त्याला आपणही असेच जैन मुनी बनावे असे वाटू लागले आणि शिक्षणाकडे त्याचे दुर्लक्ष होऊ लागले. त्यानंतर तो जेथे जैन मुनी वास्तव्यात असतील तेथे जाऊ लागला. कालांतराने तो त्यांच्या सहवासात राहू लागला. त्यामुळे कलशच्या कुटुंबीयांनी मोठ्या जड अंतकरणाने त्याला दीक्षा देण्याची परवानगी दिली.

त्याची मिरवणूक काढण्यात आली. रथ, तसेच त्याला बसण्यासाठी अगदी उंच असे आसन तयार करण्यात आले. ही मिरवणूक जैन मंदिरापासून निघून महावीर पेठेतून मुख्य बाजारपेठ मार्गे श्रीराम पूल आणि नंतर दीक्षा समारंभ आयोजित केलेल्या ठिकाणी वाजत – गाजत नेण्यात आली. या मिरवणुकीच्या वेळी कलशने पैसे, कपडे, मौल्यवान वस्तू उधळून त्यांचा त्याग केला. उद्या आचार्य श्री अजीतरत्न सूरीश्‍वरजी महाराज कलश दीक्षा देणार आहेत.

याप्रसंगी उपनगराध्यक्ष अशोक ओसवाल, जयंतीलाल परमार, रणजीत जैन, मोहन ओसवाल, साजन ओसवाल, किरण परमार, पंकज ओसवाल, मंगल परमार, हिम्मतलाल ओसवाल, योगेश ओसवाल, चंपालाल ओसवाल, माजी नगराध्यक्ष धनंजय चाचड, पारस जैन, जितेंद्र ओसवाल, सुनील सोनी आदींसह असंख्य जैन धर्मीय व नागरिक उपस्थित होते.