नराधम वॉचमनला जन्मठेप
| अलिबाग | विशेष प्रतिनिधी |
पाच वर्षीय अल्पवयीन मुलीवर बलात्कार करणार्या नराधम वॉचमनला पनवेल येथील सत्र न्यायालयाने जन्मठेप आणि रक्कम 50 हजार दंड अशी शिक्षा सुनावली आहे. पनवेल शहर येथिल पाच वर्षीय पिडीत मुलगी तिचे आईसोबत सदाशिव बिल्डींग, टिळक रोड, पनवेल या बिल्डींग समोरून जात असताना सदर बिल्डींगचे वॉचमन शिवमढी पांडे आणि श्रीकात पांडे यांनी पिडीतेचे आईला बिल्डींगचे गेटचे आत बोलावून घेतल.
बिल्डींग मधील एका मॅडमकडे घरकाम आहे असे सांगुन नोंदवही दाखविण्याचा बहाणा करून फिर्यादीस बोलण्यामध्ये गुंतवुन ठेवत तिच्या पाच वर्षीय अल्पवयीन मुलगीवर वॉचमन रूम मध्ये दोघांनी लैंगिक अत्याचार केले आणि सदर बाबत तिने कोणास सांगू नये या करीता तिला मारहाण करून दमदाटी केली. त्यानंतर पिडीतेने सदरचा प्रकार आईला सांगितला आणि त्यानुसार पनवेल शहर पोलीस ठाणे येथे फिर्याद नोंद झाली आणि वॉचमन शिवमढी पांडे व श्रीकांत पांडे यांचेवर गुन्हा दाखल झाला. पनवेल शहर पोलीस ठाणे यांनी सदर गुन्हयाचा तपास पुर्णपणे दोषारोपपत्र सत्र न्यायालयात दाखल केले. खटल्याची सुनावणी अति सह जिल्हा व अति सह सत्र न्यायाधीश, पनवेल शाइदा शेख यांचे न्यायालयात झाली. याप्रकरणात पिडीत मुलगी, तिची आई, पंच आणि तपासिक अधिकारी यांची साक्ष महत्वाची ठरली. सदर दोन आरोपींपैकी वॉचमन श्रीकांत पांडे याचा तुरूंगातच मृत्यु झाला होता. सदर खटल्यामध्ये अति शासकीय अभियोक्ता, अॅड. प्रतिक्षा वडे बारगे यांनी काम पाहीले.
तपास अधिकारी विद्या भगत, वरिष्ठ पोलीस निरिक्षक दिपक कादबाने यांनी सहकार्य केले. सरकार पक्षातर्फे अति शासकीय अभियोक्ता, अॅड. प्रतिक्षा बड़े वारंगे यांनी मा. न्यायालयासमोर केलेला युक्तीवाद आणि दाखल केलेले न्यायनिर्णय ग्राहय धरून न्यायालयाने आरोपी वॉचमन शिवमढी पांडे, वय 25 वर्षे यास शिक्षा ठोठावली आहे. सदर दंडाच्या रक्कमेपैकी रक्कम 25 हजार रुपये पिडीत मुलीस देण्यास मा. न्यायालयाने आदेश दिलेले आहेत.