ज्येष्ठांच्या मानसिक समस्यांवर हास्याचा उतारा

डॉ. अनिल डोंगरे यांचे मार्गदर्शन

| रायगड | प्रतिनिधी |

वाढते वय आणि त्यासोबत येणाऱ्या शारीरिक व मानसिक बदलांमुळे ज्येष्ठांना भेडसावणाऱ्या समस्यांवर प्रकाश टाकण्यासाठी मशिवशांती स्नेहालय वृद्धाश्रम व विरंगुळा केंद्राच्यावतीने रविवारी, 8 फेब्रुवारी रोजी एका विशेष व्याख्यानाचे आयोजन करण्यात आले होते. अलिबाग येथील भारती तरे सभागृहात संपन्न झालेल्या या कार्यक्रमात प्रख्यात मनोविकार तज्ज्ञ डॉक्टर अनिल डोंगरे यांनी वाढते वय आणि मानसिक समस्या या विषयावर उपस्थित सदस्यांना सविस्तर मार्गदर्शन केले.

आपल्या व्याख्यानात डॉ.अनिल डोंगरे यांनी वय वाढल्यावर मानवी शरीरातील मानसिक आणि शारीरिक क्षमतेवर हळूहळू कसे परिणाम होतात, याची शास्त्रीय माहिती दिली. सेवानिवृत्तीमुळे आलेले रिकामेपण, आर्थिक चणचण, विभक्त कुटुंब पद्धतीमुळे वाढलेले एकाकीपण आणि कुटुंबातील बदललेली भूमिका यामुळे ज्येष्ठ व्यक्तींमध्ये येणाऱ्या नैराश्याबाबत त्यांनी चिंता व्यक्त केली. या नैराश्यामुळे होणारा निद्रानाश, भूक कमी होणे, अपराधीपणाची भावना आणि भविष्याबाबतची टोकाची निराशा अशा अवस्थांवर मात करण्यासाठी त्यांनी नियमित व्यायाम, योगासने आणि प्रार्थना करण्यावर भर दिला. मनाला उभारी देण्यासाठी हास्य क्लबमध्ये सहभागी होणे आणि पुरेशी झोप घेणे आवश्यक असल्याचे त्यांनी आवर्जून सांगितले.

कार्यक्रमाच्या दुसऱ्या सत्रात इतिहास संशोधक व अभ्यासक योगीराज सप्रे यांनी अलिबाग परिसरातील गडकिल्ले व ऐतिहासिक स्थळांची माहिती दिली. त्यांनी कुलाबा किल्ल्यासह खांदेरी, उंदेरी व कोर्लई किल्ल्यांचा रंजक इतिहास उपस्थितांसमोर मांडला. प्रारंभी संस्थेचे अध्यक्ष डॉक्टर सुभाष म्हात्रे व सचिव प्रतिभा म्हात्रे यांनी पाहुण्यांचे स्वागत केले. हा कार्यक्रम यशस्वी करण्यासाठी खजिनदार जगदीश थळे, सहसचिव प्रफुल्ल राऊत व मनोज पडते यांनी विशेष मेहनत घेतली. या प्रसंगी संस्थेचे सल्लागार शरद कोरडे, ज्येष्ठ नागरिक संस्थेच्या उपाध्यक्षा चारुशिला कोरडे, भारती तरे, साहित्यिक उमाजी केळुसकर आदींसह 60 सदस्य उपस्थित होते.