पनवेलमध्ये नागरी समस्यांचा डोंगर

| खांदेश्वर | प्रतिनिधी |

नवीन पनवेलमध्ये रस्त्यांची दुरवस्था, वाहतूक कोंडी, पार्किंगचा अभाव, कमी दाबाने होणारा दूषित पाणीपुरवठा आणि फूटपाथची कमतरता यामुळे नागरिक त्रस्त आहेत. तसेच, गणपती आगमनाच्या काळातही खड्डेमय रस्त्यांवरून मार्ग काढावा लागत असल्याने नागरिकांमध्ये नाराजी आहे.

नवीन पनवेल प्रभाग क्रमांक 17 येथील काली माता मंदिर ते बांठीया शाळा मार्गावर मोठे खड्डे पडले आहेत. त्यामुळे विद्यार्थी, नागरिक आणि वाहनचालकांना त्रास सहन करावा लागत असून, दुचाकीस्वारांच्या अपघाताचा धोका वाढला आहे. सेक्टर 13 मधील अंतर्गत रस्ते, पाण्याच्या टाकीकडे जाणारे मार्ग, तसेच नवीन पनवेल रेल्वे स्थानक परिसरातील सेक्टर 15 मधील रस्त्यांचीही अशीच दुरवस्था झाली आहे. त्याचबरोबर सेक्टर 13, 14, 15, 17, 18 आणि 19 परिसरात पुरेशा पार्किंग सुविधेअभावी वाहने रस्त्याच्या दुतर्फा उभी केली जातात. त्यामुळे रस्ते अरुंद होऊन वाहतूक कोंडी निर्माण होते. घंटागाडी आल्यानंतर ही समस्या आणखी तीव्र होत असल्याचे नागरिकांनी सांगितले. सेक्टर 17 मधील पीएल फाय परिसरात कमी दाबाने पाणीपुरवठा होत असून, काही ठिकाणी दूषित पाणी येत असल्याच्या तक्रारी आहेत. तसेच, नवीन पनवेल रेल्वे स्थानक परिसरात सुरक्षित फूटपाथ नसल्याने पादचाऱ्यांना रस्त्यावरून चालावे लागते. त्यातच फूटपाथवर वाहने उभी केली जात असल्याने अपघाताचा धोका वाढला आहे. त्यामुळे प्रभागातील समस्यांकडे प्रशासन दुर्लक्ष करत असल्याचा आरोप नागरिकांनी केला आहे. रस्त्यांची दर्जेदार दुरुस्ती, कायमस्वरूपी पार्किंग व्यवस्था, शुद्ध पाणीपुरवठा आणि फूटपाथ अतिक्रमणमुक्त करण्यासाठी महापालिकेने तातडीने उपाययोजना कराव्यात, अशी मागणी होत आहे.