रायगडच्या संघाचा नांदेडवर दणदणीत विजय

एमसीएच्या अंतरजिल्हा क्रिकेट स्पर्धेत

। रायगड । खास प्रतिनिधी ।

महाराष्ट्र क्रिकेट असोसिएशनतर्फे आयोजित करण्यात आलेल्या चौदा वर्षाखालील मुलांच्या अंतरजिल्हा निवड चाचणी क्रिकेट स्पर्धेत रायगडच्या संघाने सलग दुसरा विजय मिळवला आहे. शनिवारी सोलापूर येथील डॉ. बाबासाहेब आंबेडकर क्रीडा संकुल रेल्वे मैदानावर रायगड जिल्हा क्रिकेट असोसिएशन विरूद्ध नांदेड जिल्हा क्रिकेट असोसिएशन चौदा वर्षाखालील मुलांचा साखळी फेरीतील दुसरा सामना खेळवण्यात आला. त्यामध्ये रायगडच्या संघाने एक डाव आणि 19 धावांनी दणदणीत विजय मिळवला आहे.

नाणेफेक जिंकून प्रथम फलंदाजी स्वीकारलेल्या रायगडच्या संघाने सर्व गडी गमावत 191 धावा फलकावर नोंदवल्या. त्यामध्ये कर्णधार पृथ्वीराज जवके याने सर्वाधिक 35, हर्षित सिंह 34, विनय शिर्के 31, श्रेय पाटील 24, तर पवन दामगुदे याने 20 धावांचे योगदान संघाला दिले. नांदेड संघाचा पहिला डाव अवघ्या 64 धावांवर आटोपला, रायगडकडून उदय जोहल याने 5 फलंदाजांना तंबूत धाडले तर दुसर्‍या बाजूने विनय शिर्के याने 3 गडी बाद केले. पहिल्या डावात 127 धावांची आघाडी घेत रायगडने नांदेडच्या संघाला फॉलोऑन दिला होता. दुसर्‍या डावात सुध्दा नांदेडचा संघ 110 धावसांखेवर गडगडला. उदय जोहलने सुरेख गोलंदाजी करत दुसर्‍या डावात नांदेड संघाचे 3 मोहरे टिपले त्याला दुसर्‍या बाजूने अर्णव साळवीने 3, विनय शिर्के 2, तर आदित्य भारतीने 1 फलंदाज बाद करून साथ दिली. रायगडने एक डाव आणि एकोणीस धावांनी सामना जिंकत स्पर्धेतील सलग दुसरा विजय मिळवला. रायगडच्या सलग दुसर्‍या विजयानंतर आरडीसीएचे अध्यक्ष अनिरुद्ध पाटील यांनी सर्व खेळाडूंचे व प्रशिक्षक विनय पाटील यांचे अभिनंदन केले आहे.