पंजाबचा थरारक विजय

लखनऊवर दोन बळी राखून मात

| लखनऊ | वृत्तसंस्था |

अखेरच्या षटकापर्यंत रंगलेल्या सामन्यात पंजाब किंग्सने लखनऊ सुपर जायंट्सवर दोन विकेट्स राखून विजय मिळवला. लोकेश राहुलच्या अर्धशतकाच्या जोरावर लखनऊला पंजाबपुढे 160 धावांचे आव्हान ठेवता आले होते. लखनऊकडून सिकंदर रझाने यावेळी अर्धशतक झळकावले. त्यानंतर पंजाबच्या शाहरुख खानने पंजाबच्या विजयावर शिक्कामोर्तब केले.

लखनऊच्या 160 धावांच्या आव्हानाचा पाठलाग करताना पंजाबला पहिल्याच षटकात धक्का बसला. पंजाबचा सलामीवीर अथर्व तायडे हा एकही धाव न करता बाद झाला. त्यानंतर पंजाबचा प्रभसिमरन सिंग हा चार धावांवर बाद झाला. त्यानंतर मॅथ्यू शॉर्ट (34) आणि हरप्रीत सिंग (22) यांनी संघाचा डाव सावरण्याचा प्रयत्न केला. हे दोघेही बाद झाले आणि पंजाबचा संघ अडचणीत सापडला होता. त्यावेळी पंजाबच्या संघाच्या मदतीसाठी धावून आला तो सिकंदर रझा. यावेळी रझाने लखनऊच्या गोलंदाजीचा चांगलाच समाचार घेतला आणि त्याने आपले अर्धशतक पूर्ण केले.

पंजाबचा नवीन कर्णधार सॅम करनने यावेळी टॉस जिंकला आणि त्याने प्रथम गोलंदाजी करण्याचा निर्णय घेतला. पण त्याचा हा निर्णय सुरुवातीला योग्य असल्याचे दिसत नव्हते. कारण काइल मिल्स आणि कर्णधार लोकेश राहुल यांनी दमदार सलामी दिली. या दोघांनी यावेळी पंजाबच्या गोलंदाजीचा चांगलाच समाचार घेतला आणि त्यामुळे लखनौच्या संघाला यावेळी 53 धावांची सलामी मिळाली. काइल मिल्स यावेळी 29 धावांवर आऊट झाला आणि ही जोडी फुटली. त्यानंतर लगेचच लखनौच्या संघाला दीपक हुडाच्या रुपात दुसरा धक्का बसला. दीपकला यावेळी दोनच धावा करता आल्या. त्यानंतर कृणाल पंड्या फलंदाजीला आला आणि त्याने चांगली फटकेबाजी सुरु केली. पण यावेळी सीमारेषेवर त्याचा अप्रितम झेल शाहरुख खानने पकडला. यावेळी हा षटकार जाईल असे वाटत होते. पण खानने फार शिताफिने यावेळी हा झेल पकडल्याचे पाहायला मिळाले आणि कृणाल पंड्या हताश होऊन माघारी परतला.

कृणाल बाद झाल्यावर निकोलस पुरन हा एकही धाव न करता बाद झाला, तर मार्कस स्टॉयनिसही लवकर जास्त काळ खेळपट्टीवर तग धरू शकला नाही. एकाबाजूने लखनौच्या विकेट्स पडत होत्या खर्‍या, पण दुसरीकडे त्यांचा कर्णधार लोकेश राहुल हा तंबू ठोकून खेळपट्टीवर उभा होता. राहुलने यावेळी दमदार अर्धशतकही झळकावले आणि संघाला आव्हानात्मक धावसंख्या उभारून देण्यात मोलाचा वाटा उचलला. राहुलने यावेळी 56 चेंडूंत 8 चौकार आणि एका षटकाराच्या जोरावर 74 धावा केल्या. राहुलच्या या खेळीमुळेच लखनऊच्या संघाला 159 धावा करता आल्या.