रायगडच्या खेळाडूंची चमकदार कामगिरी

। कोर्लई । वार्ताहर ।

क्रीडा व युवक सेवा संचालनालय अंतर्गत जिल्हा क्रीडा अधिकारी कार्यालय मुंबई उपनगर आयोजित मुंबई विभागीय शालेय तांग सू डो स्पर्धेचे कांदिवली येथील प्रकाश कॉलेज ऑफ कॉमर्स अँड सायन्समध्ये शनिवारी (दि.21) मुंबई विभागीय शालेय तांग सू डो स्पोर्ट्स क्रीडा स्पर्धा आयोजित करण्यात आल्या होत्या. यात मुंबई विभागात समाविष्ट असलेल्या रायगड, ठाणे, मुंबई उपनगर व शहर आदी जिल्ह्यांतील प्रथम क्रमांक पटकावणार्‍या खेळाडूंचा समावेश होता. यावेळी रायगड जिल्ह्यातील खेळाडूंनी दमदार लढत देत 1 सुवर्ण, 5 रजत व 2 कांस्यपदके पटकावली आहेत.

रायगडमधील जिल्ह्यास्तरीय तांग सू डो क्रीडा स्पर्धेत प्रथम क्रमांक पटकावणार्‍या खेळाडूंनी विभागीय स्पर्धेत देखील दमदार लढत दिली आहे. यात तळा येथील श्री.गो.म. वेदक विद्यामंदिर व कनिष्ठ महाविद्यालयाचा खेळाडू शिव हिलम याने प्रथम क्रमांक पटकावला आहे. तसेच, मजगांव येथील रा.जि.प.मराठी शाळा आणि नज अकादमी हायस्कूल व कनिष्ठ महाविद्यालयाची श्रेया काबुकर, छ. शिवाजी नुतन विद्यालयाच्या ध्रुव कळके, अमोघ दळवी, रेश्मा भोईर यांनी द्वितीय क्रमांक पटकावला आहे. तर, काव्या नाक्ती व अनिह जोशी हे कांस्यपदकाचे मानकरी ठरले आहेत.