आषाणे धबधब्यावरून तरुण कोसळला

रायगड हॉस्पिटलमध्ये उपचार सुरू

| नेरळ | प्रतिनिधी |

कर्जत-नेरळ राज्यमार्ग रस्त्यावरील आषाणे येथे असलेल्या धबधब्यावर आलेल्या तरुणांच्या गटातील एक तरुण डोंगरावरून खाली कोसळला होता. दैव बलवत्तर म्हणून हा तरुण झाडीमध्ये अडकला. त्या ठिकाणी असलेल्या आदिवासी तरुणांना त्याला दरीमधून बाहेर काढण्यात यश आले. दरम्यान, या जखमी तरुणावर सध्या रायगड हॉस्पिटलमध्ये उपचार सुरू आहेत.

आषाणे धबधबा येथे मंगळवारी (दि.5) मुंबई येथील पाच जणांचा ग्रुप पर्यटनासाठी आला होता. सायंकाळी पाच वाजण्याच्या सुमारास ही सर्व तरुण मंडळी डोंगरावरून खाली येत असताना त्यातील सुशांत ताडे (20) डोंगरावरून खाली कोसळला. त्याचवेळी आषाणे वाडी येथील आदीवासी तरुण घरी परतत होते. त्यांनी दरीत कोसळलेल्या सुशांतला पाहिले आणि त्याला बाहेर काढण्यासाठी धाव घेतली. तसेच, याबाबतची माहिती त्यांनी पोलीस पाटील यांना दिली. त्यानंतर स्थानिक रहिवासी श्रीराम झुगरे, हरेश पिरकर, किरण पिरकर, दीपक साबरी, दीपक निरगुडे, कृष्णा पारधी, नामदेव साबरी, जगदीश पिरकड यांच्या मदतीला सोपान ठाणगे, प्रशांत ठोंबरे, विश्वास ठाणगे व मनोज ठाणगे हे सर्व दरीत उतरले. मात्र, त्यावेळी पाऊस सुरू असल्याने दरीत उतरलेल्या स्थानिक तरुणांना पडलेल्या पर्यटकाला शोधणे अवघड जात होते.

दरम्यान, पोलीस पाटील यांनी या घटनेची माहिती कर्जत पोलीसांना दिली आणि ते देखील घटनास्थळी पोहचले. शोध मोहीमे दरम्यान अतिशय अवघड ठिकाणी गवत झुडपात सुशांत ताडे हा तरुण दिसून आला. एका बाजूला दरी आणि दुसऱ्या बाजूला झाडे झुडपे यात हा तरुण अडकला होता. स्थानिक तरुणानांच्या मदतीने त्याला जखमी अवस्थेत बाहेर काढण्यात आले. जखमी तरुणाला बाहेर काढल्यानंतर पोलीस उप निरीक्षक जयवंत वारा तसेच जयवंत काठे, चंद्रकांत रावते, महादेव कोरे यांनी जखमी तरुणाला रायगड हॉस्पिटलमध्ये दाखल केले. सध्या या तरुणाची प्रकृती स्थिर असून, त्याच्यावर अतिदक्षता विभागात उपचार सुरू आहेत. कर्जत पोलीस ठाण्याचे प्रभारी अधिकारी पोलीस निरीक्षक संजय भोसले यांनी स्थानिक तरुणांचे कौतुक केले आहेत.