बापलेकीच्या नात्याला काळीमा

बापाकडून मुलीवर अत्याचार; 14 वर्षांची मुलगी आठ महिन्यांची गरोदर

| नेरळ | प्रतिनिधी |

कर्जत तालुक्यातील शेलू गावातील जे.के. नगरमधील 40 वर्षीय व्यक्तीने समाजातील बापलेकीच्या नात्याला काळीमा फासला आहे. आपल्या 14 वर्षांच्या सावत्र मुलीच्या अज्ञानाचा फायदा घेत अनैतिक संबंध ठेवल्याने ती मुलगी आठ महिन्याची गरोदर आहे. दरम्यान, नेरळ पोलिसांनी याप्रकरणी बापाला अटक केली आहे. शेलू गावातील जे.के. नगर या वसाहतीत सलमान अस्लम शेख हा व्यक्ती राहात असून, त्याने हिंदू महिलेसोबत लग्न केले आहे. महिलेचे ते दुसरे लग्न असून, त्या महिलेची पहिल्या नवऱ्यापासून जन्म झालेली मुलगी 14 वर्षांची आहे. या मुलीचे मूळ गाव हे परभणी जिल्ह्यातील पाथरी तालुक्यातील आहे. सलमान अस्लम शेख याने धर्माने हिंदू असलेली पत्नी आणि सावत्र मुलगी यांच्यासोबत ते सर्व जेके नगरमधील चाळीमधील खोलीत एकत्र राहतात. वयाने अल्पवयीन असलेल्या मुलीच्या अज्ञानाचा फायदा घेत सलमान शेख याने सप्टेंबर 2022 मध्ये त्या 12 वर्षीय मुलीवर जबरदस्तीने अनैतिक संबंध निर्माण करण्यास सुरुवात केली. पत्नी घरात नसताना सलमान हा दरवाजा बंद करून तिच्या अज्ञानाचा फायदा घेऊन बळजबरीने तिच्यासोबत शरीरसंबंध करू लागला. प्रत्येक वेळी ती मुलगी आपल्या आईला हा प्रकार सांगेन असे बोलल्यावर तिला जिवे मारण्याची धमकी देत होता.

सध्या ती मुलगी आठ महिन्यांची गरोदर असून, नेरळ पोलीस ठाणे येथे आपल्या आईसोबत येऊन सावत्र बापाने आपल्याबरोबर अनैतिक संबंध ठेवले आणि त्यामुळे आठ महिन्यांची गरोदर असल्याचे तक्रार दिली आहे. सदर मुलगी शेलू येथून नेरळ येथील एका माध्यमिक शाळेत नववीमध्ये शिक्षण घेत आहे. हा प्रकार समजल्यावर नेरळ पोलिसांच्या पथकाने त्या 14 वर्षीय मुलीची सोनोग्राफी केली असता हे सत्य बाहेर आले आहे. नेरळ पोलिसांनी पोलीस उपअधीक्षक डी.डी. टेले यांच्या मार्गदर्शनाखाली तात्काळ सलमान अस्लम शेख यास अल्पवयीन मुलीचे लैंगिक शोषण केल्याबद्दल गुन्हा दाखल करून अटक केली आहे.

अल्पवयीन मुलीचे लैंगिक शोषण केल्याबद्दल नेरळ पोलीस ठाण्यात गुन्हा दाखल झाला आहे. पोलिसांनी नराधम बाप सलमान अस्लम शेख यास अटक केले आहे. नेरळ पोलीस ठाण्याचे प्रभारी अधिकारी शिवाजी ढवळे यांच्यासह पोलीस उपनिरीक्षक समीर लोंढे अधिक तपास करीत आहेत.