मुंबई-पुणे महामार्गावर भीषण अपघात; पाच जणांचा जागीच मृत्यू

। मुंबई । वृत्तसंस्था ।
मुंबई-पुणे महामार्गावर रविवारी ( दि. ३० जानेवारी ) सकाळी शिलाटणे गावाजवळ झालेल्या भीषण अपघातात कंटेनर आणि कारमध्ये धडक झाल्यामुळे कारचा चुराडा झाला असून पाच जणांचा जागीच मृत्यू झाल्याची गंभीर घटना घडली आहे. मिळालेल्या माहितीनुसार ही घटना सकाळी ८ वाजण्याच्या सुमारास घडली. सदर कार ही मुंबईहून पुण्याच्या दिशेने भरधाव वेगाने येत असताना कार चालकाचं कारवरचं नियंत्रण सुटल्याने ही कार शिलाटणे गावाजवळील महामार्गावर दुभाजक ओलांडून पलीकडच्या दिशेला गेली. कार भरधाव वेगात असल्याने समोरून येणाऱ्या कंटेनरला धडकली. दरम्यान, मृत प्रवाशांची ओळख अद्याप पटलेली नसून त्यासंदर्भात लोणावळा ग्रामीण पोलीस ठाणे अधिकचा तपास करत आहेत, अशी माहिती लोणावळा ग्रामीणचे वरिष्ठ पोलीस निरीक्षक प्रवीण मोरे यांनी दिली आहे.