‌‘त्या’ बार्ज मालकावर अखेर गुन्हा दाखल

आंबेत-म्हाप्रळ पूल धडक प्रकरणी कारवाई

| म्हसळा | प्रतिनिधी |

सावित्री खाडीवरील आंबेत-म्हाप्रळ पुलाला धडक देऊन वाहतुकीत अडथळा निर्माण करणाऱ्या बार्ज मालकाविरोधात अखेर मंडणगड पोलीस ठाण्यात गुन्हा दाखल करण्यात आला आहे. याप्रकरणी सातत्याने पाठपुरावा करणारे राष्ट्रवादी काँग्रेस (शरदचंद्र पवार) पक्षाचे रायगड जिल्हा संघटक तथा श्रीवर्धन विधानसभा अध्यक्ष अझहर धनसे यांच्या आंदोलनाच्या इशाऱ्यानंतर प्रशासनाने कारवाईला गती दिली. 17 जुलै रोजी गुन्हा दाखल करण्यात आला असून, 18 जुलै रोजी संबंधित बार्जचा पंचनामाही पूर्ण करण्यात आला.

पुलाचे नुकसान करणाऱ्यांवर कारवाईच्या मागणीसाठी 16 जुलै रोजी म्हसळा येथे आमरण उपोषण करण्यात आले होते. सार्वजनिक बांधकाम विभागाने लेखी आश्वासन दिल्यानंतर उपोषण स्थगित करण्यात आले. मात्र, विभागाकडून तक्रार दाखल होऊनही सुरुवातीला गुन्हा नोंदविण्यात विलंब झाल्याने धनसे यांनी 28 जुलैपर्यंत कारवाई न झाल्यास तीव्र जनआंदोलनाचा इशारा दिला होता. त्यानंतर प्रशासनाने तात्काळ हालचाली करत गुन्हा दाखल केला आणि बार्जचा पंचनामा पूर्ण केला.

या कारवाईनंतर रायगड व रत्नागिरी जिल्ह्यातील नागरिकांना मोठा दिलासा मिळाला आहे. याप्रकरणी कठोर कायदेशीर कारवाई व्हावी, अशी मागणी अझहर धनसे यांनी केली असून, सावित्री नदीपात्रात नियमबाह्य व बेजबाबदार काम करणाऱ्यांविरुद्ध यापुढेही लढा सुरूच राहील, असा इशाराही त्यांनी दिला आहे. यावेळी धनसे यांनी या जनहिताच्या लढ्यात सहकार्य करणाऱ्या सार्वजनिक बांधकाम विभागासह पक्षाच्या वरिष्ठ पदाधिकाऱ्यांचे आणि स्थानिक नागरिकांचे आभार मानले.