गोदाम, वेअर हाऊस मालकांचे धाबे दणाणले; आमिषे दाखवून विक्री करण्याचा धंदा सुरू
| उरण । वार्ताहर ।
तालुक्यातील नैना प्राधिकरण क्षेत्रात अनधिकृत बांधकाम करणार्या बांधकामांवर आत्ता सिडकोची वक्र दृष्टी झाली असून बुधवारी (दि.15) विंधणे ग्रुप ग्रामपंचायत हद्दीतील सर्व्हे नंबर 198 -1 व 2 येथिल दोन अनधिकृत इमारतीवर सिडकोच्या नैना प्राधिकरणाच्या अतिक्रमण विरोधी पथकाने बुलडोझर फिरवून सदर इमारती जमिनदोस्त केल्या आहेत. सिडको तथा नैना प्राधिकरण विभागाच्या या कारवाईमुळे या भागातील अनधिकृत इमारत तसेच गोदाम आणि वेअर हाऊस मालकांचे धाबे दणाणले आहेत. सिडकोच्या नैना प्राधिकरणाच्या अतिक्रमण विरोधी पथकाचे प्रमोद पाटील यांच्या मार्गदर्शनाखाली ही कारवाई करण्यात आली आहे. यावेळी मोठा पोलिस बंदोबस्त मागविण्यात आला होता.
नवीमुंबई आंतरराष्ट्रीय विमानतळ व शिवडी-न्हावा शेवा सेतू तसेच उरण लोकल रेल्वे या महत्त्वाच्या प्रकल्पामुळे तालुक्यातील जमिनीवर विकासक आणि भांडवलदार यांची वक्र दृष्टी पडली आहे. अशा विकासकांनी, भांडवलदारांनी तालुक्यातील स्थानिक पुढारी, ग्रामपंचायत सरपंच, तलाठी, मंडळ अधिकारी, तहसीलदार, पोलीस यंत्रणा तसेच महसूल विभागाचे इतर अधिकारी यांना हाताशी धरून अनेक ग्रामपंचायत हद्दीतील शेतकर्यांच्या जमिनी संपादित करुन घेतल्या आहेत. अशा जमिनीची जाहिरात प्रसिद्ध करुन गोदाम, वेअर हाऊस उभारले जात आहेत. तसेच सदर जमिन ही वेगवेगळ्या नागरीकांना मोठी आमिषे दाखवून गुंठ्यांत विक्री करण्याचा धंदा सुरू केला आहे. विंधणे ग्रुप ग्रामपंचायत हद्दीतील खाडीकिनार्यावरील, पाणलोट क्षेत्रा जवळील सर्व्हे नंबर 198 -1 व 2 हि जमिन राठोड नामक विकासकांनी संपादित केली होती. मात्र स्थानिक गावकरी, शेतकरी यांना विश्वासात न घेता सदर विकासकांनी स्थानिक ग्रामपंचायतीचा नाहरकत दाखला घेऊन सदर जमिनीवर तसेच खाडीकिनारी पाणलोट क्षेत्राच्या जागेवर दगड माती, डेब्रिजचा भराव करण्यास सुरुवात केली. त्यामुळे मासेमारी करणार्या व्यवसायिकांचे नुकसान झाले. तसेच भरावामुळे खारफुटीची झाडे नष्ट होऊ लागल्याने पर्यावरणाचा र्हास होत असल्याने स्थानिक शेतकर्यांनी विंधणे ग्रामपंचायत, उरण तहसील कार्यालय, सिडको, नैना, प्रांत अधिकारी, जिल्हाधिकारी कार्यालयात तक्रार दाखल केली. तरी ही सदर तक्रारीला न जुमानता सदर विकासकांनी जागेवर बांधकाम सुरू केले.
सिडकोच्या नैना प्राधिकरण विभागाच्या अधिकार्यांनी तक्रारीची दखल घेऊन बांधकामांची पाहणी केली असता सदर विकासकांनी विंधणे ग्रुप ग्रामपंचायतकडून फक्त नाहरकत दाखला घेऊन अनाधिकृत बांधकाम केल्याचे प्रथम दर्शनी तपासात दिसून आले. मात्र इतर प्रशासकीय कार्यालयाकडून परवानगी न घेता सदर बांधकाम हे पर्यावरणाचा र्हास करुन शासनाच्या अटी शर्तीचे पाळण न करता करण्यात आले असल्याचे तपासात निष्पन्न झाले. त्यामुळे सिडकोच्या नैना प्राधिकरण विभागानी सन 2022 मध्ये सदर विकासकाला नोटीस बजावली होती. त्यानंतर सिडको नैनाकडून पुन्हा एकदा सन 2023 रोजी दहा दिवसांची नोटीस इमारतीवर लावून विकासकांच्या कागद पत्रांची पाहणी केली. मात्र कागद पत्रांची पुर्तता विकासकाकडून न केल्याने सिडकोच्या नैना प्राधिकरण अतिक्रमण विभागाने पोलीस फौजफाटा तैनात करुन बुधवारी (दि.15) सदर अनाधिकृत इमारतीवर बुलडोझर फिरवला आहे. नैना विभागाच्या या कारवाई मुळे अनाधिकृत बांधकाम व्यावसायिकांचे धाबे दणाणले आहेत.
नैना क्षेत्रातील अनधिकृत बांधकामांना नोटीसा बजावण्यात आल्या असून बुधवारी ( दि.15) सदर अनाधिकृत इमारतीवर कारवाई करण्यात आली आहे. या पुढे देखिल अशा प्रकारच्या अतिक्रमण विरोधी कारवाया केल्या जातील.
प्रमोद पाटील, नैना प्राधिकरण अतिक्रमण पथक विभाग