महायुती सरकार, ‘एप्रिल फुल’ सरकार: आदित्य ठाकरे

। मुंबई । प्रतिनिधी ।

शिवसेना (उद्धव ठाकरे) नेते आदित्य ठाकरे यांनी मुंबईतील मातोश्री येथे पत्रकार परिषद घेतली. यावेळी त्यांनी महायुती सरकारवर टीका केली. आज जगभरात एप्रिल फूल डे साजरा होतो, तर आपल्याकडे अच्छे दिन सरकार म्हणून साजरा होतो. निवडणुकीच्या आयोगाच्या आशिर्वादाने स्थापन झालेल्या महायुती सरकारचे नाव एप्रिल फूल सरकार ठेवले पाहिजे, असे आदित्य ठाकरे म्हणाले. या सरकारने दिलेली कोणतीही आश्‍वासने त्यांनी पाळली नाहीत. तसेच, आता मुंबईकरांवर घनकचरा कर नावाने अदानी कर लादण्यात येत आहे, त्याचा सर्वांनी विरोध करावा, असे आवाहन करत आम्ही याविरोधात आवाज उठवत असून तीव्र विरोध करणार असल्याचे आदित्य ठाकरे यांनी सांगितले.

आदित्य ठाकरे म्हणाले की, लाडकी बहीण योजना बंद होण्याच्या मार्गावर आहे. लाडका भाऊ योजना बंद करण्यात आली आहे. शेतकरी कर्जमाफीचे आश्‍वासन देण्यात आले होते. मात्र, शेतकर्‍यांना कर्ज भरावे लागेल, असे सरकार सांगत आहे.

पुढे बोलताना ते म्हणाले की, मुंबईवर अदानी कर लादला जाणार असे आम्ही सांगत होतो, त्याची सुरुवात होत आहे. आता शहरातील घन कचर्‍यावरही कर लावण्यात येणार आहे. मुंबई पालिकेचा आणि मुंबईकरांचा विरोध असतानाही देवनार डपींग ग्राऊड अदानीला देण्यात आले होते. आता अदानी समूह ते स्वच्छ करून मागत आहे. त्यासाठी 2.5 ते 3 हजार कोटींचा बोजा मुंबई महापालिकेवर म्हणजे जनतेवर पडणार आहे. मुंबई महापालिका आपल्याकडे होती, तेव्हा असे कोणतेही छुपे कर आपण लावले नव्हते. तसेच, आपण 500 चौरस फूटांच्या घरावर मालमत्ता शुल्क माफ केले होते. मात्र, आता एप्रिल फूल सरकार जनतेवर घनकचरा शुल्क लादत आहे. असेअनेक छुपे कर अदानी कर ममुंबईवर लादण्यात येत असल्याचे आदित्य ठाकरे म्हणाले.