सत्ताधाऱ्यांनी कामाचे श्रेय घेऊ नये; प्रीतम म्हात्रे यांचा घणाघात

| उरण | प्रतिनिधी |

आंतरराष्ट्रीय विमानतळ आणि अटल सेतू हे आम्ही केले असे सत्ताधार्‍यांकडून ठासून सांगितले जात आहे. पण, हे प्रकल्प येथील भूमीपुत्रांच्या आणि प्रकल्पग्रस्तांच्या त्यागावर निर्माण झाले आहे. प्रकल्पग्रस्तांच्या बलिदानाचा विसर पडणार्‍यांना जनता नक्की धडा शिकवेल, असा घणाघात उरण शेकापचे उमेदवार प्रीतम म्हात्रे यांनी केला.

उरण विधानसभा मतदारसंघात निवडणुकीच्या प्रचारादरम्यान प्रीतम म्हात्रे यांनी विद्यमान आमदार महेश बालदी यांनी न केलेल्या कामांचा पाढा वाचला. जी विकासकामे विद्यमान आमदारांनी करायला पाहिजे होती, ती गेल्या पाच वर्षांत उरण शहर आणि तालुक्यात झालीच नाहीत. त्यामुळे उरण तालुका मागे पडला आहे; परंतु आता उरणच्या तरुणांच्या पाठीशी शेकाप उभा राहिला असून, घाबरण्याचे दिवस गेले, असे आव्हान म्हात्रे यांनी दिले. उरण तालुक्यात म्हात्रे यांच्या प्रचाराचा झंझावात दिवसेंदिवस वाढत आहे. विधानसभेच्या निवडणुकीत प्रीतम म्हात्रे यांनी उडी घेतल्यामुळे उरण तालुक्यातील जुन्या आणि जाणत्या शेकाप कार्यकत्यांमध्ये स्फुरण चढले आहे. अशा परिस्थितीत म्हात्रे यांच्या प्रचाराला प्रतिसाद मिळत आहे. खरे तर नवी मुंबईत होणार्‍या लोकनेते दि.बा. पाटील आंतरराष्ट्रीय विमानतळामध्ये लोकांना कामाला लावण्याचे खोटे आश्‍वासन सत्ताधारी देत आहेत.परंतु विमानतळ झाल्यावर आपल्याला तिकडे फिरकूदेखील देणार नाहीत. अशा परिस्थितीत आत्तापासूनच विमानतळामध्ये कामाला लागण्याची तयारी करण्याची गरज प्रीतम म्हात्रे यांनी व्यक्त केली.

गेल्या चार महिन्यांत जे.एम. म्हात्रे चॅरीटेबल ट्रस्टतर्फे प्रशिक्षण देऊन 40 जणांना मुंबई आंतरराष्ट्रीय विमानतळामध्ये कामाला लावण्यास यश आल्याची माहिती म्हात्रे यांनी यावेळी दिली. उरणच्या पवित्र भूमीमध्ये दिवंगत दि.बा. पाटील आणि शेकापचे नेते जनार्दन भगत यांचे रक्त सांडले आहे. या दोघांच्या विचारांचे नेतृत्व करणार्‍या उमेदवाराला उरणची जनता मतदान करेल. कोणी बाहेरून आलेल्या थापाड्याला मतदान करणार नाही, असा विश्‍वासही म्हात्रे यांनी व्यक्त केला.