तोरणे, आपट्याच्या पानांच्या खरेदीसाठी लगबग
| खांदा कॉलनी | प्रतिनिधी |
विजयादशमी अर्थात दसरा सण अवघ्या एका दिवसावर येऊन ठेपल्याने पनवेलच्या जुन्या भाजी मार्केटमध्ये सणाच्या खरेदीसाठी नागरिकांची लगबग सुरू झाली आहे. दसऱ्याच्या पार्श्वभूमीवर बाजारपेठ विविध रंगांच्या फुलांनी सजली असून, झेंडूच्या पिवळ्या आणि केशरी फुलांनी संपूर्ण बाजाराला आकर्षक रूप प्राप्त झाले आहे.
दसरा सण मोठ्या उत्साहात साजरा करण्यासाठी महिला वर्गासह नागरिकांनी आतापासूनच खरेदीला सुरुवात केली आहे. घराच्या प्रवेशद्वारावर लावण्यासाठी फुलांची तोरणे, दारावरच्या कमानींसाठी फुलांच्या माळा, तसेच पूजेसाठी आवश्यक असलेल्या साहित्याला बाजारात मागणी वाढली आहे. पारंपरिक दसरा सणात झेंडूच्या फुलांना विशेष महत्त्व असल्याने बाजारात या फुलांची मोठ्या प्रमाणावर आवक झाली आहे.
सध्या झेंडूच्या फुलांचा दर साधारणतः 100 रुपये प्रतिकिलो असल्याचे चित्र बाजारात पाहायला मिळत आहे. मात्र, फुलांची आवक, मागणी आणि गुणवत्तेनुसार दरांमध्ये चढ-उतार होत आहेत. काही फुलांचे दर वाढलेले असताना, तर काही फुलांचे दर तुलनेने कमी असल्याने ग्राहक आणि विक्रेत्यांना बाजारातील बदलत्या दरांचा अनुभव येत आहे. दसऱ्याच्या दिवशी घराची सजावट करण्यासाठी विविध रंगांच्या फुलांना पसंती दिली जात आहे. झेंडूच्या फुलांसोबतच इतर सुगंधी फुले, तयार तोरणे आणि सजावटीसाठी लागणाऱ्या पानांचीही विक्री होत आहे. बाजारात उपलब्ध असलेल्या विविध प्रकारच्या तोरणांमुळे ग्राहकांना आपल्या पसंतीनुसार खरेदी करण्याची संधी मिळत आहे. सणाच्या पार्श्वभूमीवर फुलविक्रेत्यांनी विविध प्रकारची फुले आणि सजावटीचे साहित्य विक्रीसाठी मांडले आहे. सकाळपासूनच बाजारात खरेदीदारांची वर्दळ वाढू लागली असून, सायंकाळच्या सुमारास ही गर्दी आणखी वाढण्याची शक्यता आहे. दसऱ्याच्या आदल्या दिवशी होणाऱ्या खरेदीमुळे फुलविक्रेत्यांच्या व्यवसायालाही चालना मिळण्याची अपेक्षा व्यक्त केली जात आहे.