जिल्हा वाहतूक शाखेचा नाविन्य उपक्रम
| अलिबाग | प्रमोद जाधव |
बेशिस्तपणे वाहन चालविल्याने अपघात होण्याचा धोका अधिक असतो. त्यात काहीजण मृत, तर काही जण जखमी होतात. हा धोका टाळण्यासाठी जिल्हा वाहतूक शाखेने वाहन चालकांसाठी दहा सुवर्ण नियम लागू केले आहेत. हे नियम वाहन चालकांना वरदान ठरणार आहेत.
रायगड औद्योगिक जिल्हा म्हणून नावारूपाला येऊ लागला आहे. जिल्ह्यात पर्यटनही दिवसेंदिवस वाढत आहेत. अवजड वाहनांसह दुचाकी व अन्य वाहनांची संख्याही प्रचंड वाढली आहे. वाहनांची वर्दळ वाढल्याने वाहन चालकांना शिस्त लावण्यासाठी वाहतूक पोलीसांना वेगवेगळ्या प्रकारचे उपक्रम हाती घ्यावे लागतात. काहींविरोधात दंडात्मक कारवाई तर काहींना प्रबोधनात्मक संदेश देऊन वाहतूकीच्या नियमांचे पालन करण्याचे आवाहन केले जात आहे. तरीदेखील काही वाहन चालक नियम धाब्यावर बसवून बेफिकीरपणे वाहन चालवितात. त्याचा परिणाम अनेकवेळा अपघातामुळे भोगावा लागतो. या अपघातामध्ये जखमी झाल्यावर कायमचे अपंग होण्याचा धोका अधिक आहे.
जिल्हा वाहतूक शाखेने बेशिस्त वाहन चालकांना शिस्त लावण्यासाठी एक नाविन्य उपक्रम हाती घेतला आहे. दहा सुवर्ण नियम वाहन चालकांसाठी जनजागृती म्हणून लागू केले आहे. महामार्गासह रस्त्यावर ठिकठिकाणी हे दहा नियम फलकांद्वारे लोकांपर्यंत पोहचविण्याचा प्रयत्न जिल्हा वाहतूक शाखेने केला आहे. जिल्ह्यातील 60 ठिकाणी फलक लावून दहा नियमांची माहिती दिली जात आहे. त्यामध्ये दुचाकी वाहन चालविताना हेल्मेटचा वापर करावा. चारचाकी वाहन चालविताना सिट बेल्टचा वापर करावा. वेग मर्यादेपेक्षा अतिवेगात वाहन चालवू नये. मद्य प्राशन करून वाहन चालवू नये. वाहन चालविताना लेन कटींग करू नये. पादचाऱ्यांनी नेहमी फुटपाथचा वापर करावा. वाहन चालविताना मोबाईलचा वापर करू नये. रस्त्यावर धोकादायकरित्या वाहन चालवू नये. पादचाऱ्यांनी झेब्रा क्रॉसिंगच्या ठिकाणी रस्ता ओलांडावा. वाहन चालविताना पादचाऱ्यांना प्राधान्य द्यावा या दहा नियमांचा समावेश आहे. या नियमांचे पालन केल्यास जिल्ह्यातील अपघात रोखण्यास मदत होणार आहे. त्यात वाहन चालकांना हे दहा नियम वरदान ठरण्याची शक्यता आहे.
वरिष्ठांच्या मार्गदर्शनानुसार वाहतूकीचे दहा सुवर्ण नियम तयार करण्यात आले आहेत. या नियमांचे पालन वाहन चालकांनी केल्यास त्याचा फायदा वाहन चालकांन नक्कीच होईल. वाहन चालकांमध्ये जनजागृती करण्यासाठी हे नियम बनविण्यात आले आहेत.
अनिल लाड, पोलीस निरीक्षक, जिल्हा वाहतूक शाखा