समृद्धी महामार्गावर पुन्हा अपघात; 3 जणांचा मृत्यू

| वाशिम | वृत्तसंस्था |

समृद्धी महामार्गावर अपघातांची मालिका थांबण्याचे नाव घेत नाही, पुन्हा एकदा अपघात झाला आहे. अपघातग्रस्त कारने उभ्या ट्रकच्या मागील बाजूने धडक दिल्याने अर्ध्याहून अधिक कारचा पुढील भाग ट्रक खाली घुसला.

समृद्धी महामार्गावर सोमवारी (दि.3) अपघात झाला आहे. वाशिमच्या समृद्धी महामार्गावर नागपूर लेनवर उभ्या असलेल्या ट्रकच्या मागच्या बाजूला भरधाव कारने धडक दिली आहे. या अपघातात कारचा पुढचा भाग ट्रकच्या मागच्या बाजूला घुसला आहे. कारच्या मागच्या बाजूलाही तडे गेले आहेत. झालेल्या अपघातात कार चालकासह तीन जणांचा जागीच मृत्यू झाला आहे. ही घटना मालेगांवच्या रिधोरा इंटरचेंजजवळ घडली आहे. अपघातग्रस्त कार ही अमरावती जिल्ह्यातील असण्याची शक्यता असून मृतकांची अद्याप ओळख पटली नाही. कारमधून तिघे जण प्रवास करत होते. अपघातानंतर हायवे पोलीस घटनास्थळी दाखल झाले. अपघाताचे कारण अद्याप समजू शकले नाही, पुढील तपास पोलिसांकडून सुरू आहे.