पोटलज प्रीमियर लीगचा अप्पू आणि पप्पू वॉरियर्स मानकरी

। पाली/गोमाशी । वार्ताहर ।
ग्रामस्थ मंडळ पोटलज बुद्रुक आणि भैरीनाथ युवा मंडळ मुंबई ठाणे यांच्या संयुक्त विद्यमाने वतीने सत्यनारायण महापूजेनिमित्त पोटलज बुद्रुक प्रीमियर लीग अंडर आर्म क्रिकेट स्पर्धा पर्व 1 चे आयोजन रविवार, दि. 15 मे रोजी केले होते. या प्रीमियर लीगमध्ये पोटलज खुर्दमधील सहा संघमालकांचे सहा संघ सहभागी झाले होते. अंडरआर्म क्रिकेट स्पर्धेचे आयोजन केल्यामुळे गावातील नवोदित खेळाडूंना खेळण्याची संधी मिळाली, तसेच मुंबई, ठाणे येथून सत्यनारायण महापूजेनिमित्त आलेल्या क्रीडा प्रेमींनी मोठ्या प्रमाणावर गर्दी केली होती. या लीगचा अंतिम सामना संघमालक राजाराम बेलोसे यांचा अप्पू आणि पप्पू वॉरियर्स आणि सनील भुरे यांचा पार्थ पॅकर्स या दोन संघात झाला.

या लीगचा प्रथम क्रमांकाचा मानकरी अप्पू आणि पप्पू वॉरियर्स, तर उपविजेता पार्थ पॅकर्स तर तृतीय क्रमांक प्रमोद भोसले यांचा हिमांशू रायजिंग स्टार्स हा संघ ठरला. या विजयी संघास आकर्षक चषक देऊन गौरविण्यात आले. या स्पर्धेतील मालिकावीर नरेंद्र भुरे, तर उत्कृष्ट फलंदाज सूरज भुरे आणि उत्कृष्ट गोलंदाज सागर भुरे, उत्कृष्ट क्षेत्ररक्षक प्रणित धनावडे यांना आकर्षक चषक देऊन गौरविण्यात आले. या स्पर्धेसाठी ग्रामस्थ मंडळ पोटलज बुद्रुक आणि भैरीनाथ युवा मंडळ मुंबई, ठाणे मंडळाच्या पदाधिकार्‍यांसह मान्यवर उपस्थित होते.