थकीत वीजबिल वसुलीचे आवाहन

। कल्याण । प्रतिनिधी ।

महावितरणच्या कल्याण परिमंडळात आर्थिक वर्ष संपण्यास अवघे तीन-चार कार्यालयीन दिवस उरले असतानाही वीज ग्राहकांकडे (कृषिपंप व कायमस्वरुपी वीज खंडित ग्राहक वगळून) तब्बल 178 कोटी रुपयांच्या थकीत वीजबिल वसुलीचे आव्हान कर्मचार्‍यांसमोर आहे. त्यामुळे थकित रकमेची वसुली अथवा थकबाकीदारांचा वीजपुरवठा खंडित करणे हे दोनच पर्याय त्यांच्यासमोर आहेत. संभाव्य गैरसोय टाळण्यासाठी थकबाकीदारांनी थकीत रकमेचा तर इतर ग्राहकांनी चालू वीजबिलाचा त्वरित भरणा करावा, असे आवाहन महावितरणने केले आहे.

थकबाकी वसुलीसाठी मुख्य अभियंत्यांसह जनमित्रांपर्यंत सर्वच स्तरावरील अधिकारी, अभियंते व कर्मचारी वाढत्या तापमानातही वसुलीच्या कामासाठी फिल्डवर आहेत. वीजबिल भरण्याची मूदत संपलेल्या कल्याण परिमंडळातील 2 लाख 76 हजार 979 ग्राहकांकडून 176 कोटी 97 लाख रुपयांची थकबाकी वसूल होणे बाकी आहे. कल्याण पूर्व आणि पाश्‍चिम तसेच डोंबिवली विभागाचा समावेश असलेल्या कल्याण मंडळ कार्यालय एक अंतर्गत 45 हजार 181 ग्राहकांकडे 15 कोटी 32 लाख रुपयांची थकबाकी आहे. उल्हासनगर एक आणि दोन, कल्याण ग्रामीण व बदलापूर विभागाचा समावेश असलेल्या कल्याण मंडळ दोन अंतर्गत 86 हजार 561 ग्राहकांकडे 64 कोटी 8 लाख रुपयांचे वीजबिल थकित आहे. वसई व विरार विभागाचा समावेश असलेल्या वसई मंडळातील 92 हजार 427 ग्राहकांकडे 44 कोटी 95 लाख तर पालघर मंडळातील 52 हजार 810 ग्राहकांकडे 42 कोटी 4 लाख रुपयांची वीजबिल थकबाकी आहे. कल्याण परिमंडळात थकीत वीजबिलापोटी 10 हजार 394 ग्राहकांचा वीजपुरवठा मार्चमध्ये खंडित केला आहे.

मार्च अखेरपर्यंत रविवार आणि इतर सुट्टीच्या दिवशीही वीजबिल भरणा केंद्र सुरु ठेवण्यात येणार आहेत. याशिवाय महावितरणचे संकेतस्थळ, ग्राहकांसाठीचे मोबाईल अ‍ॅप, विविध पेमेंट वॅलेट आदींच्या माध्यमातून डेबिट/क्रेडिट कार्ड, नेट बँकिंग मार्फत वीजबिल ऑनलाइन भरण्याची सुविधा उपलब्ध आहे. या सुविधांचा उपयोग करून संबंधित ग्राहकांनी थकबाकी व इतर ग्राहकांनी चालू वीजबिलाचा विहित मुदतीत भरणा करून सहकार्य करण्याचे आवाहन महावितरणने केले आहे.