| पनवेल | वार्ताहर |
करंजाडे, वडघर, पारगावसह परिसरातील सर्व घरगुतीसह वीजबिलांची थकबाकी वसूलीसाठी महावितरणने मोहीम हाती घेतली आहे. तसेच, थकबाकीदारांचा वीजपुरवठा खंडित करण्यात येणार आहे. त्यामुळे वीजग्राहकांनी थकीत बिलांचा त्वरित भरणा करावा, असे आवाहन महावितरणने केले आहे. ग्रामीण भागांतील वीजग्राहकांचे बिल न भरण्याचे प्रमाण जास्त आहे. ग्रामीण भागांत थकबाकी वसूल करण्याचे आव्हान महावितरणपुढे आहे. मात्र, वारंवार आवाहन करूनही वीज बिल न भरणार्या थकबाकीदारांचा वीजपुरवठा खंडित करण्याची धडक कारवाई महावितरणने सुरू केली आहे.
घरगुती, वाणिज्य व औद्योगिक ग्राहकांकडे थकीत रक्कम न पाहता नियमानुसार वीजपुरवठा खंडित करण्यात येत आहे. भविष्यात वीजपुरवठा सुरळीत राहण्यासाठी नागरिकांनी बिले भरून महावितरणला सहकार्य करावे, अन्यथा कारवाई करावी लागेल, असे आवाहन महावितरणकडून करण्यात आले आहे. चालू व थकीत वीज बिलांचा भरणा करण्यासाठी अधिकृत वीज बिल भरणा केंद्रांसह www.mahadiscom.in ही वेबसाईट तसेच मोबाईल अॅपद्वारे ऑनलाइन सोय उपलब्ध आहे.